Den ultimo conferencia di prensa ofreci pa miembronan di Hospital Dr. Horacio E. Oduber, a duna di conoce cu aunke for di comienso algun personal sanitario no kier a haya e vacuna, te awor entre 70 y 75% di trahadonan di hospital a wordo vacuna caba.

Asina a duna di conoce Gina Maduro presidente di sindicato ABV di hospital na unda el a declara cu den e prome ronda di vacunacion e registro pa nan haya e vacuna no tabata asina activo, pero ora cu e prome grupo cu a haya e prome vacuna cu awor lo haya e di dos dosis, eynan nan a ripara un aumento di mas hende y mas di nan a cuminsa vacuna

Asina mes, el a expresa cu nan a pidi pa trahadonan di sector di cuido y miembronan di sindicato pa bay vacuna pa motibo cu pa via di e situacion di Covid-19 na hospital cu a keda conoci par di dia pasa esey por contribui pa stop e plamamento di e virus.

Di e manera aki Maduro tambe a señala cu ta baha e druk enorme riba schouder di trahadonan na hospital y di specialistanan pa motibo cu ya tin mas di un aña cu nan ta bezig caba, “nos tambe ta hende, nos tambe ta cuminsa cansa y mi ta kere nos mester tin esey bou control”, el a sigura.

Awor cu tur e variante presente na Aruba, el a indica cu e vacuna ta gratis y cu comunidad por tumel’e pa baha tur e consecuencianan y manera a keda conoci den un articulo cu Bon Dia Aruba a publica ayera di e dokter specialista di pulmon Selene Kock, e hende a haya sa con e virus ta ataca e pulmonnan unabes e ta yega na un lung fibrosis y tambe ta depende con avansa e pashentnan ta yega na hospital.

Di esaki, el a afirma cu tin pashentnan cu a warda te ultimo momento pa bay hospital y ora cu nan ta yega e tin su efectonan riba ayudo.

Tambe el a splica cu na hospital na area di spoedeisende hulp no ta Covid-19 pashent solamente cu ta eyden, tambe tin pashent di cuido regular y acute zorg y loke ta pasa ta cu si un persona ta positivo na unda nan por melding esey na su dokter di cas y despues ta wordo manda pa hospital pa ambulance cu e procedura, tambe tin e personanan cu ta positivo y ta yega na hospital riba nan mes cu eigenlijk nan mester sa cu nan mester yama nan dokter di cas, ademas tin e grupo di verdenking, hoog verdenk y laag verdenk y otro grupo cu no ta contesta e cuatro pregunta.

Di esaki, el a afirma cu algun persona no ta contesta e pregunta si nan a haya contacto cu un persona cu ta positivo pa Covid-19 y esaki ta e forma na unda hopi di trahadonan di cuido a wordo contagia.

Nan ta drenta den hospital, pero nan no ta honesto cu specialistanan y enfermeronan ora nan ta haci e cuatro pregunta importante, den cual hopi hende a bisa no y ora nan ta wordo admiti na hospital e prueba ta sali positivo.

Di loke ta trata vacunacion, Maduro a declara cu e ta kere cu esaki ta bay bira algo obligatorio y e prome cu ta bay cuminsa haci esaki ta e aerolineanan cu si e persona no ta vacuna e lo no subi riba avion, asina como un pais por implementa tambe esey pa personanan por drenta y esey e ta kere cu lo por pasa den futuro.