Segun Sra. Jennifer Arends-Reyes, Aruba como un di e destinacionnan sumamente popular den Caribe mester ta bon prepara pa e comienso di nabegacion di lineanan crucero cu pasahero. Na momento cu nos tawata custumbra cu 800 mil pasahero di crucero den e periodo prome cu covid mester bisa cu como destinacion nos no a yega eynan di biaha.

Aruba tawata conoci pa añanan cu 500 mil pasahero of menos y den transcurso di tempo bou e gobierno di signatura berde a traha pa yega na cantidadnan mas grandi. Entre otro nos centro di ciudad a wordo adapta pa na momento cu e barconan crucero yega, e cara di Aruba ta uno moderno, bunita y renoba cla pa ser explora. Tour operatornan tambe y taxistanan semper a hunga un papel importante den guia y duna nos bishitantenan un experiencia unico.

Awor cu pa aña 2021 nos ta premira un 54000 pasahero minimo cu por yega te na 150000 pasahero, e scenario di preparacion no mester ta menos intensivo, alcontrario. Mundo di crucero lo ta navegando cu menos pasahero, cruceronan exclusivo y chikito ta ser premira di bira mas popular y Aruba como destinacion mester pone su reglanan di higiena bon cla y kico ta e exihencianan pa motiva e pasaheronan pa baha, explora y contribui na nos economia. E barconan crucero ta basa nan itinerarionan riba vaccine only (18+) cu ta bira un exigencia mas ya cu tur otro protocol (masks, social distancing, hand sanitation, etc) ta keda vigente.

Bahamas como puerto por ehempel ta exigi pa baha riba e isla un health visa. E contacto cu tour operators y bookings ta bay pasa mas digital y ta conta mescos pa pagonan. Mientras cu Aruba ta preparando pa e reactivacion di linea cruceronan den e di cuater cuartal di 2021 for di e home port di Miami/Fort Lauderdale, pa tanten tin cu ta warda e green light di CDC (Center of Disease Control) pa nabega conforme e cuadro existente of bolbe publica su sailing order nobo na October 2021.

Nos lo duna bon bini na linea cruceronan manera Celebrity Millenium cu lo cuminsa na juni pa 1 biaha pa siman, tambe di Royal Caribbean Cruise Lines, Grandeur of the seas cu lo cuminsa na juli sigui pa Norwegian Cruise lines cu lo nabega pafo di awanan Mericano cu ta cuminsa di 20% te na un maximo di 50% di nan capacidad. Aruba mester prepara e area rond di nos puerto pa ta uno bon manteni, atractivo y cu bida segun e turistanan bin back y lucha pa yega na acuerdonan cu ta inclui Aruba den nan international payment platforms talbes den cooperacion cu banconan local.

Reactiva e area di Oranjestad back pa uno cu hopi ambiente incluyendo luganan sano y familiar, enfoca ariba siguridad, mantene nos destinacion atractivo y competitivo den Caribe. Reintroduci nos isla post-covid cu campañanan nobo y agresivo. Trece entre otro incentivonan fiscal pa atrae y mantene inversionista di entre otro marcanan renombra pa Aruba, stimula duty-free shopping banda di otro actividadnan popular como un otro stream of interest. Yega na acuerdonan y ‘joined venture’ cu comercio pa upgrade entre otro e piernan pa nos piscadornan local y destina un area pa invita mas yate.

Mientras cu nos mester yuda pa contene e casonan di Covid-19 na Aruba tanten cu nos no yega na e 85% di imunidad di nos comunidad, nos tin cu evita pa no yega na situacionan similar den region di mas restriccionan y ciere di puerto aereo, mester traha diligentemente riba e planan pa Aruba por recupera su briyo back, hasi un comeback den un bachi nobo y score extremadamente bon den e topnan den Caribe, cu un crecimento balansa cu ta beneficia un y tur cu kier nos isla bon entre otro trahador, ciudadano y bishitante na un manera responsabel y sostenibel.