Clementia Eugene, candidato pa PhD y docente na Universidad di Aruba Refleccionnan riba practica di trabao social Ubuntu y Paga Lomba na Aruba

Dia di Trabao Social 2021 a scoge ‘Ubuntu: Reforsando Solidaridad Social y Conectividad Global’ como e tema e aña aki, 2021. E palabra Ubuntu ta origina di Africa y ta nifica ‘mi ta pasobra abo ta. Abo ta pasobra ami ta. Nos no ta nada sin otro’.

E tema aki a resona cu mi ya cu e ta refleha mi pasion pa trabao social cu ta bin di un espacio di kier biba den un mundo di igualdad, compasion, sanacion y felicidad. Pues, mi a scoge como proposito di mi bida pa empodera tur hende cu crusa mi caminda cu cualkier vulnerabildiad pa haya e forsa den nan mes pa florece, disfruta un bon calidad di bida y bienestar.

Mi ta fascina pa e tema scogi pasobra trabao social global a acepta un filosofia Africano, Ubuntu. Africa ta participando den e proceso di decolonisa practica di trabao social y integra concepto y maneho Africano pa yena e gap cu maneho occidental a laga atras. Ubuntu ta un concepto asina. E ta referi na un ‘coleccion di balor- y practicanan cu hende color scur di Africa, of di origen Africano, ta mira como algo cu ta haci hende ser humano autentico… E ta reconoce cu un ser humano individual autentico ta parti di un mundo relacional, comunal, societal, ambiental y spiritual mas grandi y mas significante.

E virtudadnan cu ta personalisa e concepto Ubuntu tambe ta existi den cultura Caribense. Na Aruba, por ehempel, e custumber tradicional di ‘Paga Lomba’ tin un nocion similar di sosten mutuo y intercambio reciproco dentro di e comunidad. Na 2001, antropologo cultural Dr. Luc Alofs y Lentine Merkies a skirbi:
“E termino ‘Paga Lomba’ por wordo traduci como ‘pay back’ y ta deriva di e sistema di Paga Lomba den agricultura. Familiarnan y hopi biaha cu asistencia externo ta bay di acuerdo pa traha riba un pida tereno, of cosecha e producto basa riba un intercambio reciproco di labor.”

Aruba Doet, cu a cuminsa na 2013 como un iniciativa di Oranje Fonds y ta maneha pa CEDE Aruba, ta un ehempel excelente di Ubuntu y Paga Lomba den accion. Aruba Doet ta curasha tur hende pa lora manga y boluntaria den un cantidad di proyectonan di comunidad. Na 2020, 170 organisacion social a completa 191 proyecto cu sosten di mas di 2mil boluntario. Na St. Lucia, mi pais di origen, tin un concepto similar, ‘Koudmen’, cu su traduccion ta nifica ‘dun’un man’ den lenguahe Creole Frances. E ta aplica na momento cu tur miembro di un comunidad di tur edad ta bin hunto pa implementa un proyecto, manera construccion of remodelacion di un cas, construccion di un voetpad, of planta of cosecha productonan agricola. E actividadnan aki ta ser haci cu compromiso di reciprocidad, unda e fabornan lo wordo duna back pa otro persona of comunidad. Nan ta implementa cu e balor di cohesion social y un reconocemento di e poder di inter-relacionnan, hopi similar na con e idea di Paga Lomba ta manifesta den caso di Aruba Doet.

Pandemia di Covid-19 ta un ilustracion bibo di interrelacion di tur ser humano y Ubuntu, Koudmen y Paga Lomba den accion na mundo. E pandemia radicalmente y di un dia pa otro a cambia nos bida y forma di biba, lansando esnan ya caba vulnerabel den mas desesperacion y pobresa. Segun Organisacion Internacional di Labor (ILO na Ingles), mas di 34 miyon cupo di trabao a bay perdi pa Covid-19 na America Latino y Caribe mientras ingreso di labor a reduci cu 19.3%. Na Aruba, e situacion tabata similar, unda segun Caribbean COVID-19 Food Security and Livelihoods Impact Survey, 80% di hogar Arubiano a experimenta perdida di trabao of reduccion di salario. E respuestanan individual, local y global ta un fluho di sosten pa provee paketenan di proteccion social cu alivio financiero pa reconstrui seguridad di entrada di hogarnan y provee pa e bienestar di famianan.

E respuesta na Covid-19 na Aruba a ser lider ap hopi, pero e iniciativa pionero di alivio, ‘Happy to Give Back’ di CEDE Aruba, bao liderazgo di Daniel Tecklenborg, un trahador social, ta merece un mencion special. E iniciativa aki a curasha donacion online pa sosten inmediato pa e banconan di cuminda local y esnan mas vulnerabel den comunidad Arubiano. E implementacion di e iniciativa aki tabata posibel danki na trahadonan social, Gabriel Marchena y Lisa Harris di Fundacion Pa Nos Comunidad.

Cruz Cora di Aruba tambe a expande su servicionan durante Covid-19 bao liderazgo di trahador social Tracey Werleman, un alumna di Universidad di Aruba cu ta sirbi como coordinador social pa e programanan. Nos ta saluda e siguiente trahadonan social kende a traha colaborativamente cu Tracey: Mariana da Silva, Maria Jose Catalan, Janesis Cano and Jo Anne Kock. Nos ta orguyoso di e 13 stagiaire di trabao social di Universidad di Aruba cu colectivamente a boluntaria na Cruz Cora Aruba y Fundacion Pa Nos Comunidad. E iniciativanan aki ta representa e etica, balor- y principionan di Ubuntu: un modelo di practica di trabao social caracterisa pa inspira progreso economico, husticia social, distribucion di recursonan, respet, empoderacion, reciprocidad y comparti, trabao den team, colaboracion y harmonia social. Adicionalmente, e iniciativanan aki ta demostra e rol vital di trahadonan social pa preveni vulnerabilidad, contribui na desaroyo social y construi comunidadnan di cuido compasivo den e proceso.

Ta mi opinion cu e filosofia di Ubuntu ta compatibel cu pensamento di desaroyo. Al fin, kico ta e meta di duna sosten na esnan den necesidad, si no pa prosperidad humano, y pa promove nan salud y bienestar. Ubuntu, Paga Lomba y Koudmen tin un balor intrinsico en comun: e asunto di relacionalidad, i.e. reconoce e poder di busca relacionnan comunal cu otronan den buskeda di desaroyo humano. Unda ta compronde desaroyo humano como e proceso di engrandece escogencianan di un persona door di duna nan e libertad y oportunidadnan pa biba bidanan largo, saludabel y prospero; pa tin conocemento; pa tin acceso na recursonan necesario pa un standard di bida decente; pa ta capaz di participa den bida di comunidad y mantene igualdad entre tur ser humano. Pues, como trahadonan social, nos semper ta yama pa traha den colaboracion cu otronan y reconoce e importancia central di relacionnan humano, y na tur momento pa logra e metanan cu participantenan a pone nan mes. Ubuntu, Paga Lomba y Koudmen, tur ta provee e base teorico indigena di nos practica di trabao social.

Pues, mientras nos ta celebra Dia di Trabao Social, nos ta elogia e contribucionnan di tur trahador social na Aruba, den Caribe y rond mundo. Laga nos continua nos resolucion pa promove y traha dentro di e filosofia di Ubuntu, Paga Lomba y Koudmen y aspira pa bira, ‘un trahado social cu ta reconoce y promove Ubuntu (Paga Lomba, y Koudmen) conoce cu inherente den cada persona ta dignidad y balor, y cu cada persona merece respect y cu un persona ta existi dentro di un entorno cultural y un comunidad, y cu e individuo y comunidad ta duna forma, influencia y beneficia di otro.

E yamado di atencion ta pa integra e uso di Ubuntu, Paga Lomba y Koudmen den nos terminologia y practica diario di trabao social. Mientras tanto, e implicacion pa educacion di trabao social na Aruba mester tuma influencia di trahadonan social Africano, y conduci investigacion adicional pa documenta experiencianan di Paga Lomba den direccion di teorisa e concepto aki como un modelo di practica di trabao social indigena.