(ElNacional/LaPatilla) – E enfrentamento entre ehercito Venezolano y gruponan guerrillero Colombiano den teritorio Venezolano, na estado Apure, a causa cu un grupo di mas di 3.000 ciudadano Venezolano a huy pa e violencia y ta den teritorio Colombiano, segun declaracion di gobierno Colombiano.
Gobierno di Colombia a manifesta su preocupacion ayera pa e desplazamento di mas di 3.000 Venezolano pa teritorio Colombiano, en busca di proteccion contra e combate fuerte entre e guerrilla dsisdente di Farc y ehercito y forza aereo di Venezuela. Canciyeria Colombiano a expresa nan preocupacion pa e sucedidonan aki y a haci un yamado na comunidad internacional pa uni den e asistencia necesario den e crisis humanitario actual, unda miles di ciudadano Venezolano a huy bay Colombia en busca di refugio.
Disidentenan di e grupo guerrillero Farc, cu a firma acuerdo di paz cu gobierno di Colombia, a ataca diamars e sede di Servicio Nacional Integra di Administracion Aduanero y Tributario (Seniat) na La Victoria cu explosivo. E sede a keda completamente destrui den e enfrentamento entre e guerrila y militarnan di ehercito Venezolano. Durante e atentado gran parti di e comunidad a keda servicio electrico, segun informacion di Daniel Martinez, periodista y director di e portal El Circulo de Arauca.
Javier Tarazona, director di e ONG Fundaredes, a publica un serie di video den cual por observa e daño causa na e edificio di Seniat y un punto di control di Guardia Nacional localisa na banda.
Presidente interino di Venezuela, Juan Guaido, via su cuenta di Twitter, a sigura cu e enfrentamento entre grupo paramilitar contra ehercito Venezolano na estado Apure ta ocasiona pa e “proteccion” cu regimen di Nicolas Maduro ta ofrece na “narcoterorismo”.
