Richard Krammers ta e hefe di Guarda nos Costa. desde cu su persona a bin traha na e departamento aki tin un trankilidad y e situacionnan ta canando. Sinembargo no ta tur hende den Guarda nos Costa tin e mes un caracter y tampoco no ta tur ilegal ta tuma e entrada na GNG di un manera pasivo. Nos di bon dia Aruba a acerca hefe di e departamento di GNC pa asina elabora riba e situacion cu ta sali afo cu e trato den GNC no ta esun di mas miho.

Semper GNC ta traha den e margen di derechonan humano unda cu na e departamento tin un verpleekundige den servicio y si tin mester ta haci apelacion na un dokter pa bin mira e situacion di e ilegal na e momento ey. Tur persona prome cu nan yega GNC nan ta keda controla sea na warda di polis, kustwacht of na cualkier departamento cu nan ta prome cu nan keda treci na GNC.

Abase di e protocolnan di DVG tur persona ta keda controla. Si resulta cu un persona a test y e tin COVID GNC ta sigui e protocolnan di DVG unda cu ta isola e persona y ta duna nan vitamina y tur locual cu nan tin mester pa nan tin e resistencia pa atende cu e virus. Esaki ta significa cu na ningun momento ta laga e personanan hunto cu otro na momento cu e resultado sali positivo.

E hende muhe y e hende homber tambe ta separa, tur e hende muhenan ta keda na GNC na aeropuerto y e hende hombernan ta keda den container na Dakota. Tur dia e ilegalnan ta haya tres cuminda pa dia, mainta merdia y atardi , esaki tambe ta den costo di Aruba.

Den e container tin corchonnan y tur e corchonnan tin nan cover y tambe nan ta haya un paña pa pone riba dje. Sinembargo hopi di e personanan cu tin den detencion mayoria ta personanan cu no ta tene nan mes na tur sorto di regla di higiena, aunke cu ta keda haci limpi regularmente esaki no ta keda limpi den un dia completo.

Loke ta un realidad cu na GNC tin varios tipo di persona unda cu uno ta mas slordig cu otro y di otro banda ta haya otro personanan cu no a custumbra den un situacion cu no ta di luho. GNC ta trata pa tene e areanan aki mas limpi cu ta posibel y cada trailer ta keda haci limpi constantemente, pero tin personanan cu no ta contento cu nan ta den GNC ,ta haci hopi mas dificil y ta comete destruccion tambe.

Esaki ta pone cu e otro personanan cu ta drenta despues ya caba ta haya un situacion no desea , pero nan mes un paisanonan ta haci e destruccionnan aki unda cu nan mes mester keda y ta causa cu e sfeer no ta esun di mas agradabel. Di e manera aki un ta daña pa otro. E potret nan y e videonan cu a sali den comunidad ta netamente scenarionan cu a keda crea pa duna un impresion manera cu e situacion ta malisimo.

Gobierno a inverti pa e trailernan keda den bon condicion, pero e mes un ilegalnan ta drenta y destrui esaki y consecuencia di esaki ta cu otro nan cu mester bin enbes di a drumi riba e cama cu esun prome cu ne a drenta no por haci esaki debi cu e la kibra esaki di mala fe. Asina aki gobierno a haci un cantidad grandi cada bes di inversion di cama y fan, pero cada bes ta presenta e mes un situacion cu tur cos ta keda kibra. Esaki ta un falta di respet y tambe destruccion na cosnan cu no ta di nan pero di land Aruba.

Esunnan cu den pasado a kibra cama, nan ta haci esaki pa haya un arma sea pa kibra candal y of forsa porta . Segun Krammers e situacion a bira asina alarmante cu dadomomento mira e inversion di e tantisimo cama y fan cu e ilegalnan ta kibra y despues e ciudadano di Aruba ta esun cu tin cu paga pa esaki nan, ta yega un momento cu e corchon tin cu bay riba vloer y keda riba vloer.

Containernan na momento cu nan a drenta e cura di GNC nan tabata nechi fura e mes un ilegalnan aki ta scob nan , tira mokete riba nan y hasta trapa riba labamano y logicamente ta keda kibra. Loke ta un realidad na momento cu kibra 8 pa 9 wasbak dadomomento lo mester bin cu un otro solucion.

Ta di lamenta cu asina mes nan ta saca un potret y video di un escenario cu nan mes ta crea y laga mustra cu e situacion den GNC ta un situacion cu ta normal , pero e realidad ta otro.

Segun krammer na momento cu un persona haci un destruccion na propiedad di gobierno ta pone un keho contra di nan y por sigui nan penalmente.