Dialuna a habri cu bon noticia pa loke ta trata turismo crucero. Despues cu durante 1 aña largo nos waf di crucero no a mira ningun movecion, Minister di Turismo a bin cu e noticia cu entrante cuminsamento di juni, porfin lo cuminsa wak turista crucero bek na Aruba.
Lider di POR, Alan Howell a indica cu e ta sumamente contento di por a scucha e noticia aki, cual ta un indicacion cu ta mirando luz den horizonte y cu e comerciantenan chikito, cual ta un di esunnan cu mas a sinti e consecuencianan di e pandemia, por cuminsa hala rosea un biaha mas.
Howell por a compronde cu e prome crucero cu lo yega Aruba ta esun di Celebrity cual lo trece bida den centro di ciudad un biaha mas. E prome ‘call’ lo ta dia 8 di juni y lo bishita nos isla un biaha pa siman. Pa loke ta trata Corona Virus, e bentaha di e crucero aki ta cu tur tripulante y pasahero mester ta vacuna prome cu nan aborda. Adicional, e pasaheronan mester presenta un PCR test negativo no mas bieu cu 72 ora.
E paso aki ta trece cune un sentido di siguridad pa nos poblacion tambe cu lo cuminsa mira regreso di e turistanan crucero riba nos isla. Pa loke ta e protocol ora nan baha, Alan por a compronde cu ainda no tin algo definitivo, pero mirando cu ta trata di pasaheronan y tripulacion vacuna, e ta kere cu e chens ta grandi cu nan lo por move libremente manera semper tabata e caso.
Ta spera cu e bon noticianan di turismo crucero continua y asina poco poco bay bek na e nivelnan cu Aruba a conoce di cantidad di bishitantenan crucero, cu ta contribui grandemente na economia no solamente di centro di ciudad, pero di henter Aruba.
