2016 a bay hopi malo pa kiosconan na Waf

Varios doño di kiosconan na Waf ta splica Bon Dia Aruba cu e aña aki tabata uno hopi malo pa nan. Hopi ta bisa cu e tipo di turismo biniendo ultimamente no ta cumprando.

“Mayoria di turismo cu ta bin den crucero ultimamente ta hende di edad cu no ta gasta mesun hopi cu turista cu ta bin keda den hotel, e comerciante Adi Saladin ta bisa. Sr. Saladin ta doño di un kiosco na Waf cu ta eynan desde 1939. Sr. Saladin ta bisa cu antes nan tabata haya miho barco ta bini cu tabata mas tanto Latino Americano cu semper ta esunnan cu mas a gasta. Pa motibo di entre otro e problemanan cu tin na Venezuela, e caida di compra a cay masha hopi mes segun Sr. Saladin.
E turista Mericano y Canades ta cumpra ainda pero no manera antes tampoco.

Bolo mas chikito
Doñonan di kiosconan na Waf cu tin decadanan eynan ta bisa cu e ultimo dos pa tres añanan a bini mas kiosconan cu ta haci e bolo bira hopi mas chikito. “Bo bay mas pabao unda e kiosconan nobo a cuminsa lanta, bo no ta haya Arubiano eyden. Mi a pidi pa mi yiu haya un luga na e luga nobo na Welcome Plaza, pero e no a hay’e. E motibo ta cu tres aña pasa ya nan a wordo ocupa door di e hendenan pabao. Nos cu ta bon pagado di impuesto no ta haya e tipo di oportunidadnan ey, mi ta hopi decepciona,” Sr. Saladin ta bisa.

Kiosconan ilegal
Comerciente Eddie Croes ta splica Bon Dia Aruba cu e ta un di esunnan di mas bieu den e negoshi di kiosco na Aruba. “Tempo nan aya ora cu ami a cuminsa, den 1987 ney,  esaki tabata un luga unda chollernan tabata drumi akiden manera e difunto Roy. E luga aki tabata un mercado di pisca cual Arubianonan no tabata uza. Venezolanonan tabata mara boto aki tras y nan tabata haci bagamunderia y porkeria akinan tempo nan aya.”

Despues cu Waf a cuminsa desaroya y crece, hopi di esunnan cu tabata bende fruta a cuminsa bende T-shirt. “Tabata tin hopi envidia. Hendenan no tabata haya luga pues a cuminsa subi tereno y lanta kiosco ilegal pabao di Waf, cual actualmente ta pabao di Arubus”, sr. Croes ta bisa cu ora MEP tabata den gobierno, nan a ‘ruim op de boel’ anto pone e kiosconan aki riba parkeeplaats patras di Arubus. Pa motibo cu hopi di e kiosconan aki no tabata bende, e doñonan a dicidi di bende e kiosconan na hendenan di entre otro nacionalidad Haitiano, di Ecuador y Peruano. Despues cu Gabinete Eman a bin na mando atrobe segun sr. Croes, pa motibo cu nan a promove nan mes hopi den comunidad Haitiano, a ofrece nan luga nobo pa kiosco net pabao di Arubus. “Eynan nos problema a cuminsa. Henter Waf a wordo afecta door di varios kiosco ilegal cu no a funciona. Kitando mas di mita di nos benta.”  Akinan ta papiando di hendenan cu no ta registra anto cu no ta paga impuesto ni huur segun algun comerciante di Waf ta splica.

Bon Dia Aruba a acerca algun kiosconan rond di parada grandi di bus y puntra nan riba pagamento di huur y documentacion pero no a logra haya mucho reaccion riba esey. Doñonan di kiosco na Waf ta bisa cu por ehempel un articulo cu ta costa $15 cerca nan, bo por haya pa $7 dollar na otro banda. Akinan no tin un bon control di prijs y ora cu Bon Dia Aruba a acerca algun di e kiosconan aki cu algun pregunta, nan no por a contesta bisando cu nan ta djis un trahado eynan.

Otro sla
Curaçao ta gana $2.50 pa cada pasahero di crucero drenta Curaçao unda cu na Aruba tabata paga $4. Actualmente esaki ta dobel na Aruba caminda cu crucero mester paga awo $8 pa cabes di barconan cu ta carga casi 4.000 pasahero. “Barconan no kier paga $8 pa cabes pa mara e barco aki. Esaki tabata un otro sla duro pa nos.” Algo cu varios otro comerciante a comenta riba dje ta cu awor a habri mas luga di souvenirnan cu ta cabando cu negoshinan chikito. Sr. Croes ta comenta cu:  “E no ta husto kico nan a haci kibrando tur e negoshinan chikito na Boulevard. Un tribon grandi a bin come tur pisca chikito akinan anto e ta masha pica. Pasobra ora bo ta comerciante bo ta depende di bo benta, bo debenan y gastonan cu bo tin. Pa diripiente bo benta dal abao atrobe mas cu mita, ta unda bo ta bay?”