No mester warda… Pa simplifica gobernacion…

Nos a cuminza e siman aki cu e perspectiva di un ola nobo di Covid-19, loke ningun di nos ta desea. Sin embargo, descuido di e ciudadano, cierto di nan, y di esnan cu mester a vigila, ta haci cu nos mester aporta na preveni esaki awor. Nos ta comparti preocupacion di gobierno cu no ta e idea pa bati alarma na momento cu e pandemia a bay for di man atrobe. Nos mester ta consciente di e hecho cu e crisis di Covid-19 por explota den cuestion di un par di siman. Nos por mira esey por ehemplo na Corsou, unda recientemente for di un situacion bon controla dia 1 di maart 2021, di 64 caso activp apenas, a mira un crecemento exponencial te na 1.160 caso activo ayera, 22 di maart.

Na e momento aki e situacion na Aruba mes ta parce mas tranquil, cu 426 caso activo ayera, di cual 57 ta persona di exterior, un aspecto pa tuma na cuenta tambe. Sin embargo, casi tres siman pasa nos tabata na 169 caso activo, e punto mas abao cu nos a yega despues di e brote grandi di augustus/september 2020. Pues awor ta e momento pa corta, pa nos no yega na e situacion cu a sorprende na Corsou, unda ayera mester a anuncia un ‘lockdown’ completo pa por lo menos dos siman. Ta parce cu denden ultimo simannandi campaña electoral di un of otro manera toch tabatin demasiado aglomeracion di hende, loke a percura pa e brote grandi actual aya.Importante ta pa corda cu nos no ta combati e virus pa e peligro como problema di salud so, ta e consecuencianan economico ta pone nos den mas situacion critico cu nos ta aden caba.

Na e momento aki ta parce cu nos ta den un pausa, unda no tin tanto enfasis riba nossituacion economico, salvo e grito cu a sali di e gremio gastronomico, cu ta sinti cu e medida di dos persona so na un mesa ta algo exagera, cu asina leu cu nos ta corda no tabata den e paquete di medida na augustus/september 2020, cu 1600 caso activo. E rapportnan di e agencianan internacional a bin te bay, no tin presupuesto 2021 di manera cu no por tin debate politico riba esey tampoco. Un bon momento pa contempla e sinfin di tarea cu ta warda gobierno pa yega na reforma. Nos no ta mira tanto accion ainda di gobierno den esaki, y nos por sinta warda te dia gobierno bin duna nos un vista den nan plannan, pero mientras tanto di hopi cos cu nos por contempla caba.

Ehemplo di esaki ta e reduccion di e tarifa di impuesto riba importacion pa material di construccion, di 12 pa 10%, cu riba su mes por ta un medida bon, cu e speranza cu e aumento di material cumpra y importa lo compensa pa e perdida cu caha di gobierno ta sufri cu e reduccion inicial. E pregunta ta con esaki ta fit den e cuadro general di reforma fiscal, unda banda di move mas den direccion di impuesto indirecto, tambe lo ta recomendable pa bin cu un simplificacion di e actual ‘selva’ di diferente tarifa cu ta existi, cu a cuminza parce e guia di belasting Hulandes cu ta sali tur aña y cada vez ta bira mas voluminoso. Aya tambe cada tanto tempo ta lanta grito pa por fabor simplifica e sistema di impuesto, loke no ta sucede y den esey nan ta parce un poco Caribense… En todo caso, lo ta bon si nos logra atende e anomalianan den esun di nos. Laga nos no lubida cu den e sistema anticua di impuesto di importacion ainda tin e famoso 22% di impuesto riba mueble importa; un reliquia di tempo cu nos tabata parti di e pais Antiyas Hulandes, unda a impone e tarifa ridiculo aki pa proteccion di industria di mueble na e hermana isla, industria cu no ta existi mas, ademas, si nos ta ekiboca, nos a sali di Antiyas na 1986, of no…? Cada tanto tempo ta duna e hotelnan un exencion riba nan importacion di muebles pa renoba nan negoshi, pero e ciudadano mes no ta haya ningun ‘break’, al contrario ta keda paga e tarifa completo.

Simplificacion ‘across the board’ di e sistema di impuesto di importacion ta pas bon den e maneho di uso mas eficiente di recurso humano den e aparato publico, y ta simplifica e trabao di aduana, y ta simplifica tambe e trabao di e companianan cu ta percura pa maneho di carga cu ta drenta y sali. Esaki ta haci cu tramite di importacion por bira mas barata, loke por beneficia prijs pa consumidor. Na 2006 e delegacion di FIAS, un agencia liga na IMF/World Bank, a calcula cu, aplicando un tarifa general di 11%, pa tur importacion, gobierno di Aruba lo a ‘break even’ pa loke tabata entrada di invoerrechten di e tempo ey. Tuma na cuenta cu esaki ta hasta inclui vehiculo di motor, loke ta hopi atractivo pa nos tur. Un bon parti di loke nos ta financia na banco di un auto of motorcycle, no ta e vehiculo sino e impuesto di importacion… Nos no mester warda pa haci cierto cambionan. Tema pa campaña, anyone…?