Ayera durante un conferencia di prensa di gobierno, prome minister Evelyn Wever-Croes a elabora tocante e evolucion di e pandemia na Aruba. El a enfatisa e aumento di casonan como tambe e dificultadnan cu e variantenan Britanico, Brasileño y di Sur Africa ta nifica pa nos pais.

Wever-Croes a indica cu tin un averahe di 50 caso nobo di Covid-19 registra na Aruba pa dia. Sinembargo, el a indica cu mayoria di esakinan no sa, of no kier comparti, unda nan a haya e virus. Asina ta constata cu no tin e fuente bao control, y p’esey ta considera cu e ta ‘widespread’, loke ta nifica cu e ta plama na e pais. Como reaccion pa esaki, Wever-Croes a introduci un plan di escala cu lo implementa pa trece e coronavirus bao control un biaha mas.

“Na e momentonan aki nos ta bay mantene e medidanan cu nos tin aworaki caba, pero enforsa nan”, el a indica. Ademas lo reforsa e medidanan aki cu algun medida adicional. Pero si esakinan no duna resultado, lo mester escala e medidanan. Ta premira cu esaki por tuma luga dia 1 di april.

Tocante kico e escalacion aki ta nifica, Wever-Croes a duna algun ehempel, manera cu lo permiti solamente negoshinan esencial pa habri; cera tur servicio cu no ta esencial y limita esnan esencial na 50%. Cu esaki ta reduci e cantidad di hende na trabao y riba caya.

Si esaki no duna resultado, lo pasa na e siguiente escala. Esaki lo nifica cu mester bin cu shelter in place y cera scol. Orario di ciere y toque de queda ta bira mas trempan, manera tabata na maart di aña pasa. “Pero nos tur kier evita esaki”, Wever-Croes a indica, y pa e motibo aki ta tumando e medidanan prudente den e fase aki, y ta spera di por conta cu cooperacion di comunidad.

“Ora bo tuma medida bo mester tene den balans tur aspecto: aspecto di salud, aspecto economico, comercio, doñonan di trabao cu por perde entrada y por kita hende for di trabao”, Wever-Croes a indica. “Bo mester tene cuenta tambe cu e aspecto di salud mental y trankilidad di nos famianan. Na momento cu bo ta cera tur hende den cas, na momento cu no tin entrada, no tin cuminda, na momento cu mester prohibi alcohol tambe riba dje, ta creando un bom eynan cu talbes na e momento ey tin mas peso cu e parti salud of e parti economico.”

Wever-Croes a indica cu ta cu tur e consideracionnan aki ta tuma decision. Sinembargo, el a comenta cu por a nota cu comunidad mes a relaha nan actitud y no a cumpli cu e reglanan di Covid-19.

“P’esey awe mi ta dirigi mi mes na esnan cu a fada, cu a cansa, na esnan cu a lubida cu tin reglanan, na esnan cu talbes ta kere cu Aruba no ta den un pandemia mas”, Wever-Croes a declara. “Mi ta sigur cu mi ta papia den nomber di tur hende ora mi bisa cu nos tur a fada di e crisis aki. Nos tur ta fada di e corona aki. Pero e no a fada di nos ainda. E t’ey, e ta sigui causa daño, e ta sigui ranca hende for di nos bida.” Wever-Croes a recorda cu e virus ta persistente, agresivo, y ‘hopi cruel’, un virus mortal. Un biaha mas, el a recorda tur medida basico pa combati coronavirus, manera laba man, usa hand sanitizer y tapaboca tur ora, y hopi importante, tene distancia di otro. Igualmente el a insisti pa tur hende cu ta presenta ‘un solo sintoma’ por fabor isola nan mes y yama pa haci test.