Victoria electoral ta un… Victoria gobernando ta otro…

E victoria aplastante di partido MFK na Corsou lo keda resona pa basta tempo den cabez di mayoria di e politiconan di e otro agrupacionnan. Un di e preguntanan cu nan lo haci ta, con e partido ey, den tempo di Covid, sin posibilidad di tene actividad cu grupo grandi di hende, y sin acceso na e medionan di comunicacion tradicional den un campaña, a logra yega na motiva tanto hende pa bay vota contra e gobierno actualmente demisionario. Nos no ta bay specula, pero por imagina nos mes algun metodo, cu a bira posible a traves di e medionan moderno di comunicacion cu nos tin na nos disposicion awendia.

En todo caso, a logra capta e malcontento bao di e poblacion, cu tabatin di haci cu e acuerdo cu Hulanda, y e institucion di COHO, pero tambe cu e problemanan di patronahe politico, corupcion y nepotismo, cu mescos cerca nos, ta parti di e cancer interminable cu ta haci gobernacion husto y eficiente un ilusion. Den esey, mescos cerca nos, no ta mira un cambio ainda, y no ta sorprendente cu cierto momento un parti sustancial di e electorado ta harta di e practica aki y ta pasa pa vota na e otro banda, sin cu realmente tin un perspectiva cu e gobierno nobo ta bay goberna manera mester ta, lagando nan propio mala mañanan un banda.

E voto pa un alternativa, aunke e no ta un alternativa, pasobra e ganador di e eleccion di diabierna pasa ta nada mas cu un partido tradicional cu tabatin mas cu su ‘fair share’ den e tradicion di corupcion, cu un lider cu a caba di sali di prison pa acepta soborno durante su actuacion como promer ministro, tabata un voto di desesperacion. Den un crisis economico di e magnitud actual, perde eleccion como gobierno cu mester handle e situacion, ta un posibilidad hopi grandi semper. Loke a sucede e mesun siman na Hulanda ta mustra tambe cu maneha un crisis, bon segun un parti di e electorado, y malo segun e otro, no necesariamente mester conduci na derota pa e partido(nan) den gobierno. Pero aki tabatin un diferencia grandi: Recurso! Gobierno di Hulanda ta parti di un grupo selecto di pais cu tin acceso na recurso financiero, hustamente pa e maneho financiero estricto cu gobierno tras di gobierno ta hiba. Y ta net riba e punto aki cu nos islanan no tin nada na nan fabor. Nos tin un caha di placa di gobierno bashi, debe astronomico, y un economia cu den ambos caso a haya golpi serio, cu un perspectiva di recuperacion bastante dificil.

Como parti di e Reino hunto cu e pais prospero ey, nos por haci uso di e posibilidadnan cu esey ta brinda pa nos no keda pega den e actual desastre. Sin embargo, e acuerdo cu Hulanda na Corsou a haya un oposicion hopi mas fuerte cu por ehemplo na Aruba, unda oposicion ta expresa nan malcontento cu e acuerdo finalmente firma cu Hulanda, y no lo laga ningun ocasion bay perdi pa vocifera esaki, pero na Corsou a campaña cu e consigna di ta rechaza e acuerdo cu a duna bida na COHO completamente, haciendo esaki e tema di eleccion. Cu esey ta facil pa mobilisa hende na Corsou, sentimentonan anti-Hulanda y anti-Hulandes ta facil pa haya hende cana tras di e bandera ey, esey a resulta den e victoria no anticipa pa hopi na e isla.

E pregunta grandi ta, con e asunto aki ta bay sigui? Awor sie demas preguntanan mester bin dilanti.Manera: bo ta rechaza e acuerdo cu Hulanda, pero kico bo ta brinda como alternativa pa soluciona e problemanan actual? No tin contesta riba esaki ainda; no ta conoci tampoco ki dia lo haya esey. Pero e situacion no a cambia, tin un parti sustancial di e poblacion ta desemplea y sin cuminda. Segun gobierno Hulandes, den nan informacion na parlamento Hulandes, 15 pa 20% di e poblacion na Corsou ta depende di ayudo alimentario actualmente. Y esey no ta tur. E perspectivanan pa recuperacion economico no ta mucho mihor cu pa Aruba, cu ta mas dependiente di turismo, pero e sectornan clave na Corsou no ta brinda tanto perspectiva tampoco. Mescos Aruba tin un refineria sin futuro, no solamente pa e crisis mundial pero tambe pa e desaroyo den sector petrolero unda no tin mester di tanto capacidad di refinacion mas. Turismo ta un tercio di esun di Aruba, pero casi completamente dependiente di e publico Hulandes. Kico ta bay pasa si e confrontacion cu gobierno Hulandes bira algo mas general, y turista Hulandes stop di bin na e isla? Kico ta bay pasa cu inversionnan grandi cu inversionista Hulandes a haci den e lugar, por ehemplo den rehabilitacion di e partinan di patrimonio cultural den Willemstad? Pa colmo, tambe e sector di servicio financiero di Corsou no ta absolutamente mas loke e tabata. Pues, kico ta e strategia economico pa e isla, si e confrontacion ta bay tuma lugar cu e pais di unda pan ta yegando actualmente? Ta imaginable cu den desesperacion un parti di e poblacion ta deposita su confianza den e ganador, pero den e caso aki ta un cu no tin nada di ofrece, solamente problema. Nan pasado ta papia pa su mes.