Diabierna ultimo den un conferencia di prensa di Gobierno di Aruba y Crisis Team a keda treci dilanti diferente topico, entre nan loke ta trata informacion cu Departamento di Salud Publico mester ora un persona ta positivo pa Covid-19 y pashentnan cu ta interna den hospital.

Sharline Koolman di Departamento di Salud Publico a menciona cu ora nan ta registra casonan positivo di Covid-19 nan tin un team di persona encarga pa investiga y haci diferente pregunta pa e persona cu ta malo, pa asina haya informacion di cuanto persona ta infecta, na unda e persona ta traha, cu ken nan tabatin contacto, entre otro.

Locual nan ta hayando den ultimo momento ta cu esunnan infecta no ta dunando e informacion completo, nan ta tene e informacion atras of nan tin miedo di informa cu nan ta traha na un empresa of departamento.

Por ta nan ta pensa cu nan ta perhudica e departamento of empresa pero nan ta haciendo net pa robes”, Koolman a expresa.

Loke el a sigura ta cu nan a registra varios caso di e mesun empresa den diferente dianan, pa loke segun e persona afecta a informa pa nan cu nan a sigui tur e protocol pero Koolman a afirma cu tur esey por keda evita, si na e momento cu e persona ta keda puntra y e ta duna informacion corecto, esey no ta pa straf ni pa cera ningun empresa, e ta pa evita e plamamento di e virus.

Di esaki, el a bisa cu e mesun personanan a bay cas y nan pega e virus na su famianan, un persona cu tin e virus ta cana cune y ta sinti e sintomanan entre 3 pa 5 dia, den e tempo aki e mester yama su dokter di cas of mester busca ayudo.

El a sigura cu e situacion aki ta hopi dificil pa nan por haci nan trabou debidamente si e personanan no ta duna e informacion corecto, lo cual ta pasa tambe ta cu nan ta papia cu e personanan na unda nan ta haya e informacion y despues nan ta haya un yamada di e mesun persona indicando cu mester kita un persona for di e lista di contacto pa motibo cu el a haci un fout of no tabatin un contacto di dje.

E momento cu bo ta duna informacion, e informacion ey so nos por usa, salud publico por adapta su maneho pero si e informacion no ta completo of no ta manera e mester ta nos ta sigui haya situacionnan manera nos ta hayando aworaki”, Koolman a comenta.

Di loke ta trata hospital, nan a haya diferente pregunta den ultimo simannan di cuanto persona ta keda admiti na hospital y cuanto hende ta fayece, di e datonan cu nan tin nan a logra di sa cu e mayoria di esunnan cu a keda admiti tin mas di 65 aña di edad, el a sigura cu nan a yega na hospital “hopi laat” cu nan no a haci e prueba di Covid-19 ni un biaha, nan a yega na hospital pa via di presenta un rosea cortico y esaki ta personanan cu ya tabatin 3 of 5 dia caba cu algun sintoma.

Esaki ta e grupo cu mi ta ripiti pa e momento cu bo ta presenta e prome sintoma por fabor meld esey na bo dokter di cas.

Di personanan interna den hospital te cu ayera, e situacion di personanan infecta cu Covid-19 ta di 10 den unidad di Cuido Intensivo y riba piso general tin 23, banda di esaki tin 3 trahado di hospital cu a keda contagia y 5 cu ta den cuarentena.

Di e cantidad di cama disponibel, Koolman a declara cu tin 30 cama disponibel cu ta keda usa pa pashentnan admiti pero mester tene na cuenta cu si tin cama disponibel pero no tin personal pa atende cune nan no ta mucho leu.

Pa nan e ta un challenge tur dia pa deal cu e suficiente cama y pa tin suficiente personal pa atende e camanan ey.

Den esaki, por a agrega ademas e casonan di personanan cu ta haya accidente of esunnan cu ta yega na hospital bou efectonan di alcohol cu segun Koolman esey ta causa accidentenan, nan tambe ta yega na hospital y na cuido intensivo cu mester usa camanan cu principalmente ta dirigi pa personanan cu Covid-19.

Asina mes, el a duna di conoce cu di e pashentnan interna den Cuido intensivo, 47% di nan ta obeso, nan ta presenta un obesidad hopi halto, 45% ta diabetico y 65% ta sufri di hipertension, esun di mas hoben tin 36 aña y esun cu edad mas halto tin 79 aña.