(Infobae) – Paraguay a alcansa e total di ocupacion di cama di cuido intensivo pa aumento di casonan di Covid-19, mientras cu gobierno ta purba habilita espacionan nobo y ta evalua extende e atencion medico pa campamentonan.
“Di 655 cama na sector publico y di hospitalnan integra, actualmente tin 655 cama ocupa. Ta un 100% di ocupacion”, Leticia Pintos, director general di Rednan y Servicio di Salud a bisa den un conferencia di prensa.
Pintos tambe a confirma cu a surpasa e capacidad di e salanan di reanimacion. “Di 92 cama cu a wordo habilita pafo di cuido intensivo, cu ta yama sala di reanimacion, tambe ta ocupa na 100%”, el a agrega.
E cartera sanitario “ta traha duro” pa suma mas cama na cuido intensivo, sala di reanimacion y internacion, y tin calcula e habilitacion di servicio den proximo dianan, Pintos a señala. Diasabra ultimo a habilita 42 cama di internacion, di e cual 30 a ocupa mesora, e funcionario a indica.
“Nos tin cu cuida” Pintos a bisa, y tambe a enfatisa pa ciudadanonan pa keda den nan cas y no asisti pa eventonan social cu por bira pio e halto nivel di infeccion, cu a aumenta desde haci 10 dia. “Ta importante pa tene na cuenta na ora di sali, por fabor, mantene e medidanan di distanciamento, uso di tapa boca. Nos ta insisti un biaha mas den e cuidadonan, pasobra nos ta den un situacion compleho”, el a admiti.
Na Paraguay te diasabra ultimo a registra 192.599 caso y un total di 3.695 fayecido, 33 di nan den ultimo 24 ora, riba un poblacion di 7 miyon di habitante.
Diabierna ultimo e pais a ricibi 36.000 vacuna di AstraZeneca di e mecanismo Covax, apoya pa Organisacion Mundial di Salud, e cantidad aki ta suma pa 20.000 dosis di e Chines Sinovac cu Chile a duna haci un siman y 4.000 di Sputnik V cu a cumpra pa Rusia y cu lo permiti imnunisa 90% di e personal medico y paramedico cu ta combati e pandemia, segun e minister di Salud, Julio Borva a informa.
