(AP) — Pa segundo biaha e siman aki, agencia di gobierno Mericano pa seguridad riba caminda ta mandando un team pa investiga accidente di un Tesla na Michigan.
E biaha aki, e National Highway Traffic Safety Administration ta mandando un team special di investigacion di accidente pasobra un Tesla usando e sistema di coremento parcialmente automatisa di e compania, Autopilor, a crash den un auto di polis estatal cu luznan cendi band’i caminda.
Ta un señal mas cu e agencia di seguridad bao presidente Joe Biden por ta tirando un bista mas serio riba regulacion di sistemanan di asistencia na chauffeur, manera Autopilot, como tambe vehiculonan autonomo. Anteriormente a tuma un maneho ‘hands-off’ riba tecnologianan nobo, faboreciendo cumplimento boluntario cu seguridad pa asina no interferi cu e sistemanan di seguridad prometedor.
Den e accidente riba caminda, e auto di polis tabata para riba Insterstate 96 na Eaton County cerca di e capital estatal Lansing, mientras un trooper tabata investiga un accidente cu un auto a dal un venado diaranson mainta, WLNS-TV a reporta. Ni e trooper ni e chauffeur di 22 aña di edad di e Tesla a resulta herida den e accidente pa 1:10am, polis a bisa. Chauffeur di e Tesla a ricibi citacion pa faya di move y core cu un licencia suspendi.
Den un declaracion, NHTSA a bisa cu lo manda e team pa investiga ‘consistente cu supervision vigilante di NHTSA y su autoridad robusto riba e seguridad di tur vehigulo di motor y ekipo, incluyendo tecnologianan automatisa’.
Un e-mail solicitando comentario di Tesla diaranson anochi no a ricibi contesta inmediato. Tesla a desarma su oficina di prensa y tin lunanan sin contesta mensahe.
Anteriormente e siman aki, NHTSA a manda un team special di investigacion di accidente na Detroit pa un accidente involucrando un Tesla cu a bay bao di un semitrailer. Dos persona den e Tesla a resulta herida den e accidente laat diahuebs. WJBK-TV a cita un hefe di polis interino bisando cu tur indicacion ta cu e auto no tabata den modo Autopilot.
E circunstancianan di e accidente na Detroit tabata similar na dos otro na Florida den cual autonan Tesla a core bao tractor-trailer, causando dos morto. Den ambos accidente, na 2016 y 2019, e autonan tabata siendo maneha usando sistema Autopilot di Tesla, cu por maneha un auto pa tene esaki riba caminda y stop di dal vehiculonan su dilanti.
E movidanan di NHTSA pa manda teamnan na ambos accidente ta indica cu por ta tumando un posicion diferente riba sistema di maneho automatico, segun Sam Abuelsamid, analista principal pa Guidehouse Insights. “Ta parce cu bao e administracion nobo, NHTSA finalmente a cuminsa tira un bista serio riba esaki”, el a bisa.
NHTSA anteriormente a investiga mas di un decena di accidente cu Tesla, pero no a haci ningun accion publico. Na januari, prome cu Biden a asumi su cargo, a menasa un audiencia publico y posibel accion legal pa forsa e compania basa na Palo Alto, California, recall vehiculonan pa un problema cu touch screen.
Tesla anteriormente a bisa cu su Autopilot y su software ‘auto-chauffeur completo’ ta sistema di asistencia pa e chauffeur y cu e chauffeur mester ta cla pa interveni na cualkier momento.
Tesla a ricibi critica di Hunta di Seguridad di Transporte Nacional pa faya di adecuadamente monitor chauffeurnan pa sigura nan ta pone atencion. NTSB, cu ta investiga accidente y ta duna recomendacion, tambe a critica Tesla pa permiti e sistema traha riba caminda cu e no por maneha.
Abuelsamid a bisa cu un carta na februari na NHTSA di presidente di NTSB, Robert Sumwalt urgiendo regulacion di e sistemanan nobo por a duna impulso pa NHTSA tuma mas accion. “Nos ta spera cu finalmente nos lo mira NHTSA establece standardnan” pa sistemanan di asistencia di chauffeur, el a bisa.
Jason Levine, director ehecutivo pa e nonprofit Center for Auto Safety, a bisa cu ta ora pa NHTSA cuminsa bira serio tocante e riesgo cu companianan manera Tesla, ‘cu intencionalmente ta gaña publico tocante e capacidadnan y defectonan di su tecnolgia’, ta presenta pa tur motorista.
