Manera Bon Dia Aruba a publica den su edicion di 17 di maart, Minister di Enseñansa, Ciencia y Desaroyo Sostenibel, Armando Rudy Lampe no ta haya sosten di Parlamento pa su plan di fusion di Emmaschool y Scol Paso pa Futuro.

Pa cu esaki, minister Lampe a publica riba su rednan social un comunicado na unda el a trece dilanti algun punto cu e ta considera obhetivo relaciona cu e fusion di e dos scol.

El a splica cu na december, ambos maneho di e scolnan Moeilijk Leerbare Kinderen (MLK) a sinta hunto cu Minister Lampe y nan a yega na acuerdo pa cu e fusion di e scolnan.

Lampe a expresa cu e proposicion a bin di e cabesante di Emmaschool, mirando cu den pasado a hiba combersacion y brainstorming tocante e fusion. Ambos scol lo mester a ser informa di e proposicion aki. Na scol Paso Pa Futuro esaki a ser comunica, pero na Emmaschool esaki no tabata e caso, segun el a sigura den su comunicado.

Siguientemente Lampe a laga pa e team di maneho actual di ambos scol informa nan team tocante e fusion. Na januari di e aña aki, Lampe a bishita ambos scol y haci esaki su mes.

Despues team di maneho di ambos lo a reuni y traha riba un manera structura pa cu e fusion, a cuminsa trata riba e parti logistico, e cantidad di alumno y despues lo a sigui pa e parti di personal.

Lampe a sigura cu tin informacion cu a sali den algun medionan di comunicacion cu e no a menciona y cu no ta cuadra, “esey ta crea un scenario caotico cu no ta na bienestar di e interes general di e grupo meta aki”, minister a enfatisa.

“Ta importante pa trata na duna espacio, respet, dialogo y debido tempo pa atende cu retonan y preocupacionnan di personal y operacional”.

Ademas, el a declara cu sindicato ta trece varios punto dilanti cu base emocional y cu ta crea confusion den e proceso, e cual ta haci’e preocupante. Y alabes ta crea preocupacion cerca e team di Scol Paso pa Futuro.

Tanto personal di Emmaschool y Sindicato a presenta nan argumento cu ta desvia di realidad y atakenan practicamente personal den contra di team di Maneho.

Manera ta duna indicacion cu lo kita utilidad, manera biblioteca, di esaki el a sigura cu tin un rectificacion cu lo bay over na SWAP, kiermen e utilidadnan aki lo wordo ubica na un otro caminda cu e mesun funcion.

El a continua splicando cu loke ta di suma importancia ta pa realisa cu den e plan di fusion ta papia di un cantidad relativamente aceptabel pa cu e ubicacion na e edificio na Ayo, banda di esaki e parti curiculo ta keda igual, es decir mesun metodo ta wordo brinda na e grupo meta aki.

“Ta cuestionabel con sindicato ta trece informacion dilanti cu base emocional y no ta opta pa busca informacion corecto obhetivo, pero ta inverti mas tempo creando confusion y ophitsing cual no ta necesario”, minister a afirma.

Di mesun manera, el a sigura di cu e manera con por a trata esaki por a bay den un ambiente mas trankilo y profesional, cambio sigur ta trece retonan cune cu ambos team di maneho a cuminsa traha riba esakinan. “Pa cu preocupacionnan por a handle esaki internamente, como profesionalnan den e ramo aki nos por yega na otro y sigur manera e dicho ta bisa, 2 cabes ta pensa miho ….. Na final di dia nos ta traha na bienestar di nos muchanan”, e comunicado a señala.

Den e parti cu ta sigui ta duna splicacion kico ta encera e grupo meta, pa un y tur por compronde y cera conoci cu nos scolnan, minister a splica e verhuizing te cu e parti di fusering, unda ta duna espacio pa e teamnan yega na otro y sigur e mehoracion di e calidad di enseñansa cu e fusering lo trece cune.

Emma Scol & Scol Paso Pa Futuro ta scolnan basico special di Gobierno,nan tipo di enseñansa ta encera MLK, muchanan cu tin nan mesun ritmo mas poco poco pa siña.

Saliendo for di puntonan di bista menciona caba, scol special basico ta brinda e muchanan espacio riba nan propio tempo, nivel mas pratico y den un grupo mas chikito conforme na ley. Mirando e pasonan tuma a pone cu e 2 special basis onderwijs por fusiona cu otro.

Pa loke ta trata e edificio na Ayo, esaki a ser diseña specificamente pa e grupo meta aki. A tene na cuenta y a sigui conseho cu localidad, espacio y curiculo.

Espacio: Edificio na Emmaschool ta conta cu 9800 m2, carpinteria, cushina, parke y tin espacio pa por laga e muchanan haci gardening.

● E parti curiculo e dos scolnan aki ta haci uso di e mesun metodonan.

● Pa locual ta trata e reparticion di e klasnan, aki a tene cuenta cu cifranan ricibi di MDC pa cu aanmelding durante full a.e. 2021-2022. A base di ley di Speciaal Basisionderwijs a forma e klasnan y sigur tin espacio pa asina muchanan por inscribi nan mes na scol. Klasnan por consisti di 9 te cu 14 alumno. Tambe ta importante pa menciona cu den cada klas lo tin asistencia di 1 te cu 2 assistent segun advies di MDC.

● Pa loke ta trata alumnonan di 13 aña of mas bieu/grandi di e edad, lo ta sigui na scol secundario cu tin profesionalnan cu ta brinda e guia ahusta cu e alumnonan aki mester.

Verhuizing tot fusering den fase tabata peticion di cabesante di Emmaschool pa asina por tuma mas tempo pa por sigura un traspaso responsabel pero tambe pa e por logra traha na mehoracion di entre otro e curiculo pa cu enseñansa special basico. Mirando e añanan di experiencia y dedicacion di e cabesante saliente, lo por yuda aporta na mehora e curiculo pa e grupo meta aki y brinda tempo suficiente pa pasa su conocemento y experiencia na e cabesante nobo.

E dos scolnan aki lo keda existi cu nan maneho. E nomber di Emmaschool lo cambia den Scol Soeur Juliette, pa kita e stempel negativo cu e scol a bin ta haya durante aña, segun minister a enfatisa.

E intencion di mudanza y e fusion den fase no lo ta visibel cerca e alumnonan di ambos scol, como profesionalnan di enseñansa lo mester por yega y bay traha pa asina sigura un traspaso mas miho y di calidad posibel pa tur e muchanan. Pa cu esaki minister a opta pa crea un team di maneho cual lo ta bou di encargo di profesionalnan pa guia e proceso, e team di maneho ta consisti di personanan cu ta y cu tin experiencia pa cu e grupo meta aki.

Pa loke ta trata nomber di e scol, a scoge pa bin cu un nomber nobo y den e caso aki ta duna honor na un persona femenino.

A trece dilanti cu Souer Juliette tabata e un di e prome pilarnan cu a lucha pa enseñansa y muchanan special na Aruba, su titulo y profesion no mester ta un estorbo pa por elogia un persona local cu ta di suma importancia pa e pais, manera el a menciona.

E plan/intencion di fusering den fase lo brinda diferente punto nan di mehoracion pa cu scol basico special:

● Lo mehora electra di e scol (cu pa añanan no tabata bon)

● Internet (lo drecha esaki)

● Intercom den tur lokaal

● Airco den e lokaalnan cu ta falta.

● Modernisacion: Sistema digital den cada klas

● Branding di e scol completo manera e.o: rapport digital, registracion di ausencia, newsletter, webpage, templates etc etc.

● Gardening cu ta sluit aan cu e parti secundario.

● Mantencion di e parke

● Asistencia den cada klas. Un miho reparticion di assistent den cada klas.

● Hekwerk

● Omheining

Di otro banda, Sindicato di Maestro (SIMAR) su presidente Josephine Albertus a reacciona riba e comunicado aki y a informa cu sindicato no kier trece crisis den Gobierno, e decisionnan unilateral cu segun el a sigura ta sin pia y sin cabes di minister di Enseñansa, ta causa no solamente intrankilidad cerca maestronan, pero tambe cerca studiantenan, mayornan y e gobierno.

Sindicato t’ey pa sali na defensa di su miembro y no pa complace minister di Enseñansa, “Ta lamenta cu e den e 3 añanan aki minister di Enseñansa nunca a scoge pa involucra e sindicato pa yuda pensa na momento cu kier introduci un idea, pero ta prefera di busca confrontacion cu sindicato y enseñansa door di no dialoga, como ehempel: ki dia minister a parti e fuseringsplan pa esunnan concerni???” Albertus a declara.