(AP) — E proceso pa forma un gobierno di coalicion nobo na Hulanda a cuminsa ayera, un dia despues cu partido conservador di prome minister Mark Rutte a logra un di cuatro victoria consecutivo, den un eleccion cu a tuma luga durante un lockdown nacional y domina pa pandemia di Covid-19.
E logro a pone Rutte den posicion pa lidera negociacionnan pa coalicion, mas probablemente cu otro gran ganador – e centrista, pro-Europeo, partido D66, lidera pa ex-diplomatico Sigrid Kaag, kende a balia riba un mesa diaranson anochi na momento cu un encuesta di salida a mustra su partido capturando un di su victorianan mas grandi den historia.
Sinembargo, e dos partido aki probablemente lo tin mester di al menos dos partner mas pa forma un coalicion di mayoria. Segun agencia noticiero nacional ANP, pasa riba 88% di e votonan conta, partido di Rutte, VVD a gana 35 di e 150 asiento den Tweede Kamer, mientras D66 a gana 24.
Rutte kier move rapidamente pa implementa un plan di recuperacion di coronavirus prome cu bay den un blueprint di gobierno pa e termino di cuatro aña di e coalicion.
“Nos mester tin plan na vigor pa saca e pais di lockdown”, Rutte a bisa su legisladornan den un reunion virtual diahuebs.
E panorama politico dividi na Hulanda – 17 partido tabata pronostica pa gana al menos un asiento – por haci e negociacionnan di coalicion dificil.
Lidernan di partido a tuma e prome stap diahuebs nombrando dos ‘scout’, un di VVD y otro di D66, pa examina e deseonan di diferente partido y investiga posibel coalicionnan prome cu negociacionnan formal.
VVD a selecta e Senador, Annemarie Jorritsma, mientras D66 a scoge Kajsa Ollongren, kende tabata minister di interior y prome minister interino den ultimo gabinete di Rutte. Nan tin plan pa cuminsa negociacion cu lidernan di partido dialuna, y skirbi un reporte pa e legisladornan recien eligi na caminda pa nan prome reunion dia 31 di maart proximo.
“Den tempo di corona, claro ta importante pa forma un gabinete nobo lo mas pronto posibel… pa nos por cuminsa traha riba e recuperacion economico y social”, Jorritsma a bisa, agregando cu e ta spera lo ta posibel pa forma un coalicion nobo prome cu berano.
Victoria di Rutte tabata pronostica maske e eleccion a bin apenas dos luna despues cu su ultimo coalicion a renuncia tocante un scandal den cual oficina di impuesto di e pais eroneamente a label miles di famia cu a ricibi ayudo social como fraudulento.
E otro gran ganador di e anochi tabata e partido populista di ultraderecha Forum voor Democratie, cual a aumenta di dos na ocho asiento despues cu su lider carismatico, Thierry Baudet, a campaña riba un promesa pa termina e lockdown na e pais.
Mientras otro lidernan di partido a papia cu reporteronan diaranson anochi, Baudet tabata briya pa su ausencia. Pa diahuebs mainta, e hashtag riba Twitter ‘waarisbaudet’ (‘unda baudet ta’) tabata un tendencia na Hulanda. E partido eventualmente a expresa gratitud na votadornan.
“Mey miyon persona na Hulanda a bisa: nos kier nos bida back. Un golpe resonante na e lockdown sin fin. Un victoria enorme pa libertad”, e partido a tweet.
Baudet, yegando parlamento pa un reunion di lidernan di partido, a bisa reportero cu e ‘tabata sperando mas’ asiento den eleccion.
Tabata un sorto di resureccion politico pa e partido cu a keda kibra aña pasa memey di reportenan di mensahenan di texto anti-Semitico entre su hala hubenil.
A pesar di avancenan pa Baudet, e bloc populista ultra-derecha na Hulanda probablemente no lo participa den ningun coalicion nobo. Legislador anti-Islam, Geert Wilders, kende su Partido pa Libertad a perde tres asiento y awo ta e di tres partido mas grandi na e pais, a bisa cu e lo bolbe lidera oposicion.
E iskierda politico tambe ta parce di keda fuera di poder, despues cu partidonan a perde asiento of no a logra gana teritorio despues di cuatro aña como oposicion di e coalicion centro-derechista di Rutte. GroenLinks, un gran ganador den eleccion 2017, tabata pronostica pa perde mita di su 14 asiento.
E eleccion na Hulanda, yegando apenas algun luna despues cu e divorcio ‘Brexit’ di Reino Uni for di Union Europeo a yega, a mira ganashi entre partidonan pro-UE. D66 pa largo ta un defensor fuerte di e bloc di 27 nacion y entre e partidonan nobo den Tweede Kamer tabata e partido pro-Europa, Volt, cu tabata pronostica pa gana tres asiento.
Kaag, kende a sirbi como minister di Comercio Stranhero y Desaroyo di Cooperacion den ultimo coalicion di Rutte, a campaña como un alternativa viabel na Rutte como lider nacional den un pais cu nunca a yega di tin un prome minister femenino. Papiando cu legisladornan di partido ayera, el a delinea e temanan clave di su partido. “Nos kier unidad, renobacion y sostenibilidad”, el a bisa. “D66 mester sigura, y lo sigura, cu esaki ta tuma luga.”
