(EFE) – Polis Brasilero a habri un investigacion rriba e publicacion di un video den cual un homber ta menasa di morto e ex-presidente Luiz Inacio Lula da Silva, ken a recupera caba su derechonan politico despues di e anulacion di su condenanan, ayera diamars fuentenan oficial a informa.
“Polis Civil di Estado di Sao Paulo a cuminsa un investigacion pa haya e echonan” Secretaria di Siguridad regional a señala den un comunicado.
E imagen a circula riba rednan social dianan despues cu e hues di Corte Supremo Luiz Edson Fachin a anula e condenanan di prizon cu tabata pesa contra e ex-mandatario pa presunto corupcion, cu loke a recupera su derechonan politico.
Den e video por a mira un homber -ta parce cu ta un empresario di interior di Sao Paulo, segun prensa local- cu un bandera di Brasil den su curpa y un arma di candela den su man.
E individuo a tira varios biaha, ta señala su arma y a bisa algun insulto dirigi na e ex-hefe di Estado (2003-2010), bisando cu “e lo haya den problemanan”.
“No purba di transforma mi pais manera Venezuela. Mi ta bay plama mi sanger pero mi ta bay lucha pa mi pais. Mi ta bay haci mi parti. Mi no lo admiti cu mi pais lo bira un Venezuela. E lo haya den problemanan”, e homber a bisa.
E decision di Edson Fachin, cu a yega na Fiscalia General, a duna back pa Lula su derechonan politico y lo por bira un candidato presidencial den eleccionnan di aña 2022, pa e cual Bolsonaro, lider di ultra derecha Brasilero, ta pretende di presenta su mes pa e re-eleccion.
Lula a laga habri e posibilidad aki den su prome aparicion publico e aña aki despues di e decision ey, aunke su discurso tabatin un accento electoral marca, el a insinua un hipotetico programa y a realisa criticanan duro pa e actual mandatario pa su manera di gestiona e pandemia di coronavirus y su afan cu armanan di candela.
