(EFE) – Leu di e dudanan cu a hiba varios pais pa stop e vacunacion cu AstraZeneca, Gobierno di Mexico ta busca acelera e inmunisacion negociando cu Merca pa cu lo comparti e dosis di e farmaco aki.
Secretario di Relacionnan Exterior, Marcelo Ebrard, diamars ultimo a limita su mes ora el a bisa cu e negociacion cu Gobierno di e presidente Joe Biden “ta bayendo bon”, pa asina duna su inventario di e farmaco Britanico aki, cu su uso no a wordo autorisa na Merca.
Segun a revela den un conferencia di prensa hunto cu e presidente Andres Manuel Lopez Obrador, Mexico a solicita “e mayor number posibel” di vacunanan y a sigura cu lo haya un contesta definitivo diabierna awor.
E negociacion aki a cuminsa durante e prome reunion virtual entre Biden y Lopez Obrador, na unda e Mexicano a pidi pa Merca acceso pa vacunanan cu a wordo produci na e pais ey, te awor Mexico a ricibi farmaco fabrica na Europa, China, Rusia y India.
“E negociacion cu Merca door di e palabracionnan cu e presidente Biden ta bayendo bon, pero mi no lo duna detayenan tanten esey lo termina, pero mi ta optimista”, Ebrard a bisa.
E intencion di Gobierno Mexicano di haya e vacuna di AstraZeneca na Merca a keda conoci den pleno situacion di desconfiansa pa via di e supuesto efecto secundario di e vacuna Britanico.
Spaña, Alemania, Francia, Italia, entre otro, den ultimo oranan a suspende e aplicacion di e vacuna aki pa e riesgo di trombosis y embolia.
Sinembargo, Agencia Europeo di Medicamento (EMA) ayera diamars a publica un mensahe pa trankilisa na unda a sigura cu nan “ta firmemente convenci” cu e beneficionan di e vacuna ta sigui supera su riesgo.
Expertonan Europeo ta warda pa por anuncia diahuebs awor si e casonan cu a wordo reporta “ta un coincidencia of un efecto secundario straño” di AstraZeneca.
