18 di maart pa Edselyn Figaroa: “Pa mi ta un dia pa nos para keto y reflexiona, pa nos por celebr’e”

Edselyn Figaroa ta un persona hopi conoci den comunidad pa loke ta trata area cultural. Mirando cu 18 di maart ta un dia special pa nos isla, Bon Dia Aruba a dicidi di tene un entrevista cune pa haya sa con el a cuminsa riba caminda cultural, y su dedicacion pa celebra e di 45 aña di himno y bandera.

Figaroa a conta cu su trayectorio a cuminsa na su kleuterschool, na unda juffrouw Edith Harms tabata un persona cu tabata laga e muchanan canta hopi e canticanan di Aruba. Despues di esey el a bay na Colegio Ora Ubao y el a scoge e caminda cultural un biaha mas, pa motibo cu e ta considera e parti ey hopi importante.

Mr. Candy Boekhoudt tabata duna e muchanan les di cuarta y di diferente instrumento. “Tur 18 di maart nos tabata presenta.” Despues el a pertenece na e grupo di juffrouw Maybeline Arends Croes cu a formel’e te ora el a bira un persona adulto.

“E tres luga aki a inspira mi hopi y nan a duna mi amor pa Aruba, pa asina ami tambe, awor cu mi ta grandi, mi ta comparti e caminda di e personanan aki”, Figaroa a expresa.

E fecha 18 di maart ta nifica hopi p’e, manera el a sigura, pa motibo cu e ta un dia “pa nos principalmente para keto y reflexiona con esunnan cu por a nace na Aruba tin tanto beneficio y di un pais cu ta duna nos asina hopi. Pa mi ta un dia pa nos para keto y reflexiona, pa nos por celebr’e”, el a afirma.

Igualmente el a agrega cu tin cu celebra debi cu tin libertad, y cu na otro paisnan rond di mundo ta desea di tin esey y nan no tine. Pa e motibo ey el a bisa cu nos tin cu aprecia y balor’e.

Figaroa ta un persona cu a compone hopi cantica pa Aruba y pa cu esaki, el a sigura cu esun cu mas e ta gusta cu tin relacion cu himno y bandera ta “Agente di Paz” – cu ta un cancion cu a gana festival dos aña pasa y ta papia kico e ta gusta di Aruba.

“Hopi biaha nos ta critica, pero en bes di critica, nos tin cu duna back y haci. Cu esey nos lo logra hopi mas” Figaroa a manifesta.

Arubiano ta un persona cu ta custuma di celebra e dia aki den diferente manera, aunke pa via di pandemia, e aña aki lo ta diferente. Figaroa a duna di conoce cu anteriormente e tabata bishita diferente centronan di bario, e ta conta historia y canta cu e muchanan.

Figaroa a menciona cu awe por ehemplo, e tin algun presentacion na scolnan, pero e mesun 18 di maart mes nan no por a organisa eventonan manera tabata custuma.

Manera ta conoci, Edselyn ta un persona cu ta gusta traha cu muchanan y ta p’esey cu el a crea e grupo di ‘Muchanan Sabi’, cu cual ta haci diferente actividad. Di esaki el a declara cu tin algun mucha cu no ta gusta e parti di cultura, pero e semper ta bisa nan: “Si bo ta aprecia cultura desde chikito, muchanan lo lanta cu amor pa nan cultura y e mucha nunca bo lo a siñ’e ken e ta y ki identidad e tin”.

E ta considera importante pa bisa e muchanan e parti di unda nan ta bin, pa nan sa na unda nan ta bay. Ademas cu si nan no sa nan base nan por ta un persona cu no tin un caracter of no tin identidad. “Identidad ta loke ta haci abo autentico”, el a afirma.

Aruba ta un isla cu a adopta diferente cultura desde hopi tempo pasa. Hende di otro paisnan a dicidi di bin biba akinan pa un of otro motibo, ya sea trabao of pa e trankilidad cu e santo blanco y e beachnan ta ofrece nan; pa esaki nos ta considera cu ta un isla multicultural.

Pa cu esaki, Figaroa a informa cu den cada presentacion e ta pone un toke multicultural y semper e tene cuenta cu esaki den su storianan. Por ehemplo el a bisa cu personanan di otro paisnan como Venezuela ta bin biba na Aruba y hopi biaha nan ta wordo discrimina. Ademas di nan tambe ta existi otro cultura di otro paisnan cu hende cu a bin for di tur parti di mundo y cu nan mester wordo acepta.

Den su historia pa muchanan e ta conta con tin cu acepta pero tambe tin cu siña tambe esunnan cu ta bin di afo, “e ta un respet mutuo cu mester tin”.

Pa finalisa, el a comenta cu e dia aki sigur e lo pasa den famia y tambe el a menciona e importancia cu e descendientenan di 18 di maart ta nifica pa nos, “nos tin bandera, nos tin himno, nos tin un identidad y nos tin libertad cu nos tin cu lucha pa no perde esaki”.