Durante un entrevista recien mi a indica cu e maneho cu Minister Dangui Oduber ta hibando, pa loke ta e vacunacion ta hopi bon. E maneho di recuperacion ta den pleno ehecucion.
Asina nos por tuma nota cu pa loke ta e parti di vacunacion, Minister di salubridad publico, sr. Dangui Oduber a percura pa esaki ta un exito total. Atrabes di tecnologia y un servicio sublime ta amplia e accesibilidad pa tur hende por registra y vacuna.
Algun cifra pa loke ta vacunacion
Manera ta conoci e vacuna lo yuda nos obviamente pa bringa e virus. Sinembargo e vacuna tambe ta wordo mira internacionalmente como loke ta bay percura pa paisnan por recupera economicamente mas liher. Y ta p’esey ta asina importante pa nos tur registra y vacuna. Aworaki ya caba Aruba tin 29 mil persona cu a registra y di cual casi 11 mil persona a ricibi nan prome “shot” di vacuna.
E grupo mas vulnerabel ta e grupo di “60-plussers”. Di e grupo aki ya caba 13 mil a registra y 9 mil a haya nan prome “shot” di vacuna y tin 4 mil wardando e vacunanan nobo yega pa por haya nan “shot”. E meta di e maneho ta pa percura cu por lo menos 75% di e grupo aki ser vacuna. Pues ta importante pa keda registra, pasobra falta ainda alrededor di 5 mil persona pa nos por logra e meta aki.
Comercio y AHATA
Minister Dangui Oduber a reuni recientemente tambe cu comercio y AHATA, y nan tambe ta wak e importancia pa mas hopi hende ser vacuna. Di nan banda nan a “commit” cu nan lo percura pa nan miembronan y e personal cu ta traha cerca nan miembronan wordo registra. Esaki obviamente den colaboracion cu DVG pa guia e proceso aki.
Pa conclui
Nos ta apoya e maneho di Minister Dangui Oduber y ta orguyoso cu e maneho di e Minister en cuestion, pero tambe e maneho di nos prome Minister sra. Evelyn Wever-Croes ta wordo elogia internacionalmente. Entre otro a percura pa a traves di tecnologia y metodonan nobo, manera e Aruba Health App y e unidadnan mobil, tur persona por registra y ser vacuna.
