Dos acontecimento cu tabatin su impacto riba nos industria turistico y nan ta bira e modelonan pa determina con rapido nos pais a recupera di e crisisnan aki ta: E atentado terorista di 9/11 y tambe e desaparicion di Natalee Holloway. Aruba Tourism Authority (ATA) kier haci uzo di e datonan produci durante ambos crisis pa determina e proyeccion di nan impactonan riba nos situacion actual.
Directora di ATA, Ronella Croes a bisa cu si nos ta tene cuenta cu diferente analisis y proyeccion, incluso di mundo di aviacion, sigur lo tuma hopi tempo ainda pa Aruba su turismo recupera di locual a wordo considera e crisis mas grandi cu nos a conoce cu ta e pandemia actual.
Diasabra 13 di maart ultimo nos a conmemora 1 aña di Covid na Aruba. Despues di un aña, Croes a refleha kico e pandemia a nifica pa Aruba su evolucion turistico. Na aña 2020 a registra un caida di 67%. Aruba a bay bek den tempo cu nos tabatin un cantidad di bishitante na aña 1989, kiermen mas cu tres decada atras.
E ehecutivo halto di turismo a mustra algun grafico cu ta bay for di 1980 te cu 2021. Den dje nos a mira cu locual nos tabatin den cantidad di bishitante na 1989 ta pas cu e mesun cantidad cu nos a ricibi aña pasa. Traduciendo e grafico – segun Croes – nos por a mira cla cu e crisis di Covid ta hopi mas grandi cu locual nos por a mira na 2005 cu tabata e crisis pa consecuencia di e caso Natalee Holloway. Pero tambe esun na 2001 cu tabata 9/11.
Tambe el a observa – a base di e grafico – cu despues di añanan di crecemento turistico Aruba a conoce un caida drastico. “Esey ta sin duda!”, directora di ATA a bisa. Pero el a declara cu e panorama pa 2021 nos por mira un adelanto gradual di turismo pa Aruba, unda ta spera di por subi nos cantidad di bishitante.
E intencion ta cu nos por yega recupera gradualmente na locual Aruba a mira como cantidad di turista na aña 1991 of 1996. Esaki ta mara na diferente escenario cu ATA tin desaroya, pero nan ta depende con rapido nos turismo por recupera na 2021
