No tin fecha specifico pa cuminsa acepta paspoort di salud; ATA y DVG trahando riba maneho di aceptacion di vacuna pa drenta Aruba

Te ainda no tin un fecha specifico pa Aruba cuminsa acepta un tipo di paspoort di salud como parti di nos pais su maneho pa aceptacion di vacuna contra Covid.

Pero si otro siman, Aruba lo bira e prome destinacion unda ta wordo lansa un tipo di paspoort di salud: Ta trata di e proyecto Common Pass. E ta un proyecto piloto considera como un paso concreto pa Aruba ta prepara riba diferente desaroyo rond di e vacuna.

Common Pass

Directora di Aruba Tourism Authority (ATA), Ronella Croes, a declara cu e proyecto aki ta wordo realisa entre Aruba, Common Pass y Jetblue, caminda pa medio di un plataforma digital por baha bo prueba di vacuna, etc… cu lo tin enlace cu nos sistema local.

Common Pass ta un proceso di entrada di biahe ainda mas digitalisa. Den e caso aki Aruba ta haci uzo di tur e avancenan cu nos pais tin riba e tereno aki, incluso pa medio di Aruba Health App. E proyecto aki lo wordo realisa cu Jetblue riba e ruta di Boston.

Tur hende cu ta bin Aruba mester test pa Covid, prome cu e por drenta nos pais. Sinembargo aceptacion di e vacuna di Covid – segun directora di ATA- lo por bira un estimulo pa recuperacion di nos industria di turismo.

ATA ta ricibiendo hopi pregunta riba aceptacion di e vacuna enbes di exigencia di e test di PCR pa detecta e malesa di Covid. Tambe el a laga sa cu IATA ta trahando riba e tipo di paspoort di salud digital

ATA a yega di haci diferente trabao preparatorio, tambe e team di DVG – specialmente esun cu a traha riba Aruba Health App (AHA) – ta bin atendiendo cu diferente aspecto pa cuminsa cu acepta e vacuna. Sinembargo Croes no a menciona un fecha specifico.

ATA y cluster di salubridad y transporte di Crisis Team a inicia sesionnan pa determina te na cual momento Aruba lo acepta e vacuna como exigencia of metodo di entrada pa esnan cu ta bishita nos isla. Y tambe cual lo bira e maneho cu nan ta proponiendo riba exigencia di vacuna.

Exigencia vacuna

E siman aki ATA ta poniendo hopi enfasis adicional cerca esnan cu ta labora directamente den turismo pa stimula nan tur pa registra pa e vacunacion.

CEO di ATA a declara cu pa esnan cu ta traha directamente cu turismo e vacunacion ta un aspecto integral den e proceso di recuperacion necesario di nos principal industria. “Esey ta hayando sigur mas atencion,” segun Croes.

ATA ta pone atencion necesario na e hecho nos proceso y vacunacion ta canando asina positivo, y e ta parti di informacion cu ta wordo divulga internacionalmente.

Tambe nan ta trahando riba reapertura di e turismo crucero. El a laga sa cu e protocol pa turismo crucero ta cla, pero nan mester evalu’e prome. Pa asina fiha e protocol pa medio di structura di Crisis Team.

Directora di ATA a bisa cu mester tene cuenta cu avance recien ta indica tambe diferente biahe cu ta wordo ofreci, unda ta conta esnan cu ta vacuna. El a splica cu ta trata di biahenan cu ta consisti di personanan cu tur ta vacuna. “E ta algo pa tene cuenta cune tambe,” el a bisa.

Apertura y medio ambiente

E proceso di apertura gradual di nos frontera a haci cu ainda tin paisnan na Latino America cu ta cera por ehempel Brasil y Venezuela pa diferente motibo. ATA ta spera cu pronto lo wordo anuncia apertura pa Peru. Croes ta kere cu pronto, Aruba lo ta anunciando e reapertura di nos frontera cu e pais Inca, despues di analisis cu nan a haci.

El a bisa cu a base mundial un tercera parti di paisnan tin nan frontera cera ainda. Kiermen tin ainda un gran representacion di pais cu no ta habri pa turismo. Igualmente a base di proyeccion y analisis, incluso di e mundo di aviacion, ta mustra cu lo tuma hopi tempo pa recupera for di e crisis mas grandi cu nos a yega di conoce.

Un aspecto cu el a destaca tin di haci cu nos medio ambiente. CEO di ATA a bisa cu den nan diferente reunion, nan por aprecia e hecho cu e pandemia a duna nos naturalesa tambe un oportunidad pa hala un rosea. E ta consciente cu prome di e pandemia tabatin hopi discusion riba e desaroyo di nos turismo relaciona cu aspectonan di un desaroyo sostenibel, y pasonan cu a wordo tuma pa atende cu e asunto aki.

E ta haya cu nos tin un oportunidad pa recupera economicamente, pero sin lubida di keda cuida tambe nos recursonan natural di flora y fauna, y nos playanan, entre otro aspectonan. Directora di ATA ta kere cu akinan nos tin un oportunidad pa reestablece diferente aspecto pa nos por ahusta “kisas cosnan cu por permiti nos gosa di un desaroyo turistico mas duradero ainda.”

Comportacion

Directora di ATA a bin cu proyeccion alentador di nos turismo. Nos a habri aña 2021 cu retonan, entre nan e exigencia di un resultado di PCR negativo pa bo por drenta Merca. Pero tambe cu resultadonan cu ta bao e proyeccionnan conservativo cu ATA tabatin pa luna di januari y februari, ya cu tabatin hopi cancelacion. Pa ambos luna Aruba a ricibi rold di 31 mil bishitante.

Pero pa e lunanan nos dilanti ATA ta mirando aworaki mas reservacion cu cancelacionnan. E ta brinda optimismo pa maart y tambe pa e di dos kwartaal di e aña aki. Directora di ATA a indica cu Aruba ta spera un total di 42 mil bishitante durante e luna aki. Y pa e kwartaal dos e proyeccion ta mustra cu e crecemento lo reanuda atrobe, despues cu nos a cera december na 42 mil bishitante. Pero pa logra reactiva nos turismo, e ta demanda un compromiso di henter comunidad, ya cu e ta depende di nos propio comportacion.

“Nos propio comportacion por stroba locual mi a presenta awe como proyeccion alentador,” el a bisa. Pero nos propio comportacion por yuda acelera positivamente recuperacion di turismo. Principalmente den un situacion unda cada un di nos mester sigui atende na protocol di higiena. E ta brinda e confiansa na esnan cu kier bishita nos isla.