Mi ta contento cu e veredicto di corte,” asina Prome Minister, Evelyn Wever-Croes a referi brevemente riba corte su veredicto di diaranson ultimo, relaciona cu e caso cu sindicato SIWA a entabla contra gerencia di WEB N.V.
Segun premier Wever-Croes e veredicto aki ta trece un poco di trankilidad. SIWA a entabla e caso aki contra e cortamento di 12.6% di salario na beneficio di gobierno, specificamente destina pa e fondo di FASE.
E prome mandatario ta haya cu e veredicto aki ta confirma e peticion cu gobierno a haci na e trahadonan di sector publico pa duna di nan parti y yuda cu e fondo di solidaridad. El a haci un peticion na e otro instancianan y trahadonan cu no ta haciendo e aporte ainda. Ya cu e ta considera cu nan aporte ta importante.
E ta kere cu e veredicto ta hopi cla, unda ta wordo bisa cu WEB no ta un departamento di gobierno, pero e ta un instituto si, caminda gobierno ta e accionista mayoritario y den un caso asina nan mester mustra e parti di solidarismo.
Gobierno ta satisfecho cu e fayo di corte, y nan ta evaluando aworaki con nan tin cu sigui. Ya cu independientemente di e veredicto di corte, tog nan ta keda na disponibilidad di e trahadonan pa mantene e trankilidad cu nos mester den comunidad.
