E ultimo añanan ta bisto cu presencia di hende muhe den posicion clave den nos comunidad ta grandi, te hasta nos tin un Prome Minister femenino. Sinembargo nos por scucha e sorto di critica cu hende muhe na Aruba su condicion laboral y salarial ta hopi limita compara cu hende homber, simplemente pa nan condicion di ser femenino.
Den cuadro di celebracion di Dia Internacional di Hende Muhe, Bon Dia Aruba a trata e topico aki di desigualdad laboral entre hende homber y hende muhe cu Prome Minister Evelyn Wever-Croes. E prome mandatario di pais Aruba a declara cu 8 di maart ta un dia pa para keto y reflexiona riba un lucha cu tin mas cu 100 aña. Un proceso historico caminda hende muhe ta desaroya y e derecho di hende muhe ta evoluciona te hasta e situacion cu nos ta actualmente.
“Den ultimo 100 aña nos a logra hopi,” el a bisa. Mas cu un siglo pasa hende muhe tabata victima di hopi abuso. No tabatin bos, y tampoco derecho. Pero e situacion aki -segun e prome mandatario- a cambia considerablemente hopi. Sinembargo e ta kere cu ainda e no ta caminda mester ta.
Como mandatario femenino e ta consciente cu tin algun area ainda cu mester di atencion. Un area tin cu e parti salarial. Tambe nos tin den nos leynan algun distincion ora cu ta hende casa of no. Segun e mandatario su gobierno ta trahando riba dje pa purba di limita keto bay e tipo di desigualdad aki.
E asunto di desigualdad di salario, el a bisa cu e ta hinca den ley cu no por tin discriminacion a base di sexo, ni otro tipo di discriminacion. “Sinembargo e ta un desaroyo di mercado,” el a declara. Den gobierno no tin un diferencia den pago si un empleado publico ta hende homber of hende muhe. Pero den e sector priva ainda bo por haya un diferencia den esey, y mas tanto posibel nan ta purbando di elimina e desigualdad di genero aki. “Esey ta un area cu nos tin cu traha riba dje,” el a declara na Bon Dia Aruba.
Otro punto tin di haci cu mas oportunidad pa hende muhe den posicion clave. E ta kere cu esaki no ta un tarea cu gobierno so por haci. Pero si nan mester traha riba e factornan cu ta haci cu ta permiti e hende muhe pa asumi mas responsabilidad. E ta haya cu apesar di tur e mehoransa di e ultimo añanan, e tarea di cria e yiunan ta mas tanto dirigi riba hende muhe. Si den e tereno aki e hende muhe por haya mas sosten, e ta kere cu mas ser femenino ta bay asumi cargo mas importante. “E ta esun rond di dje cu tin cu yud’e y empoder’e pa e por tuma e paso aki,” el a bisa. Pero tambe e ta haya cu nos como comunidad mester sostene esey tambe.
