Pa Departamento di Salud Publico por sa precies ki porcentahe di comunidad a bin den contacto cu COVID-19, ta necesario pa haci investigacion bao di e comunidad.

E tipo di investigacion aki ta yama ‘seroprevalentie onderzoek’ y ta consisti di saca muestra di sanger for di diferente persona den e comunidad pa por haya sa si nan tin anticuerpo contra e virus SARS-CoV-2, e virus cu ta causa COVID-19. Esaki ta dirigi pa diferente persona den comunidad cu ta referi na diferente edad, sexo y districto na Aruba.

Recientemente Departamento di Salud Publico a saca un total di 2.854 invitacion pa cu e investigacion aki, cu a wordo reparti na diferente cas rond Aruba, pidiendo colaboracion cu esaki. Nan ta señala cu esunnan cu a haya e invitacion pa por participa, di mesun manera DVG kier gradici pa e colaboracion cu ta pa un bon causa y ta invita comunidad pa tuma bon nota di e invitacion aki y sigui tur instruccion.

E carta ta informa cu pa por participa, e persona lo mester yena un encuesta y despues tuma muestra di sanger riba dia cu persona scoge. Pa por participa ta rekeri un permiso por escrito (na prikpost) y ta importante pa sa cu e participacion den e estudio di seroprevalencia SARS-CoV-2 (Covid-19) ta los for di e programa di vacuna y no tin efectonan riba si e persona ta haya e vacuna.

For di algun luna pasa, e cartanan aki a cuminsa yega den e post di algun cas di comunidad na unda ta señala cu e participacion pa esaki ta boluntario; si e persona no ta desea di participa, no mester haci nada cu e peticion ey.

Tocante confidencialidad di datonan di e persona pa e estudio aki, nan ta papia tocante informacion manera number di telefon, adres, fecha di nacemento y informacion tocante estado di salud di e participante. Coleccion, analisis y wardamento di informacion ta necesario pa por contesta e preguntanan di investigacion y pa por publica e resultadonan di e investigacion. For di rapport y publicacion di e estudio lo no por saca afo informacion personal di e participante.

Nan lo warda e datonan y muestranan biologico pa un maximo di dies aña, despues e investigacion lo finalisa y cu e persona a duna permiso pa esaki den e formulario di consentimento. Ademas, LabHOH ta sigura bao risico medico, segun loke e carta ta bisa.

Tampoco lo tin un compensacion pa participa den investigacion aki.

DVG ta menciona cu si e persona a ricibi e invitacion pa participa na e investigacion aki, e lo mester subi e website https://forms.labhoh.app/. Si e persona tin e Aruba Health App e tin cu login, si ainda no tin e Aruba Health App lo mester registra. Ora ta login of caba di registra lo mester hinca un codigo cu a wordo ricibi den e carta di invitacion, sin e codigo ey no por forma parti di e investigacion.

Esunnan cu a wordo invita pa participa y tin pregunta por tuma contacto cu seccion di Malesanan Infeccioso di Departamento di Salud Publico na e telefon 280.0101 of por manda un e-mail na callcenterdvg@gmail.com.

Pa motibo di un fayo tecnico cu a surgi, DVG encarecidamente ta pidi tur hende cu a haya un carta di invitacion na cas pa unabes mas purba pa registra pa e investigacion di anticuerpo. Si ta ripara cu tin fayo por fabor tuma contacto cu DVG.