Despues di rond di 10 aña cu un investigacion den e asesinato di presentador y periodista John A. “Poentje” Castro no a duna ningun resultado, un periodista a haci un peticion pa documentonan (Wob) na Instituto Forensico Hulandes (NFI). Documentonan duna den cuadro di e peticion ta mustra cu banda di e BlackBerry di Castro manda pa Hulanda, tambe a manda material di DNA, algo cu husticia na Aruba nunca a yega di declara anteriormente. Alabes husticia tabatin interes den mensahenan cu Castro a ricibi 8or di anochi e anochi cu el a wordo asesina.

Un anochi den bida di Poentje Castro, esta 22 di december 2010, e periodista y presentado famoso a wordo asesina den su cura di cas cu su BlackBerry den man, documentonan obteni di Nederlands Forensisch Instituut (NFI) ta indica. Casi inmediatamente despues cu su curpa a wordo haya e mainta despues, husticia a lanta un Team Grootschalig Optreden (TGO) pa purba haya e asesino. Ya riba 28 di december husticia (esta Cuerpo Policial hunto cu Ministerio Publico) a manda e BlackBerry cu e tabatin den su man na momento cu el a fayece na Hulanda pa investigacion tecnico y forensico.

Husticia tabata kier a haya acceso na e contenido di e BlackBerry di Castro, pues a pidi NFI pa desblokia e telefon, y si ta necesario, kibr’e pa haci esaki. Loke NFI a haci despues di a haya e BlackBerry di Castro riba 7 di januari 2011, ta decodifica emailnan y SMSnan cu tabatin riba e telefon di Castro.

NFI ta manda rapport cu CD na OM

Despues di loke ta mustra manera un eror di comunicacion pa loke ta paga e invoice di €6.380 pa haci e investigacion forensico, riba 31 di mei di 2011 NFI a manda resultado di e investigacion na husticia na Aruba. Maske a deliver e prome resultado preliminario den maart di 2011 y esun oficial den mei, pa via di eror di coordinacion of comunicacion, Ministerio Publico no a haya e invoice te november di 2011. Tambe ta resalta cu e fiscal a pidi pa manda e password pa e zip-file na su email personal riba hotmail.com. Riba 31 di mei 2011 NFI a manda e rapportnan oficial di e investigacion, hunto cu un CD cu tur adhunto cu ta bay cu e rapport.

Poco tempo despues, NFI a indica na e fiscal di e caso riba 12 di augustus 2011 cu nan tin un programa nobo cu lo por saca mas detaye di e BlackBerry di Castro. 3 dia despues, riba 15 di augustus 2011, e fiscal ta contesta cu e lo kier haya e informacion ey. Riba 9 di september NFI ta email e fiscal un bes mas, bisando cu tin resultadonan preliminario nobo.

Fiscal ta pidi mensahenan di e anochi di e asesinato di Castro

E resultadonan ta indica cu e metodo nobo ta saca mas informacion afo, entre otro, 278 mensahenan di SMS cu por wordo lesa, 1510 email cu por wordo lesa, y otro informacion manera contactonan. Esey ta diferencia na e metodo bieu pasobra e metodo bieu no tabata haci posibel pa lesa email ni mensahe. NFI ta indica cu mensahe di SMS #147 cu nan a haya, a wordo ricibi e anochi cu Castro a wordo asesina pa 8 or y 37 (20:37). Cu e metodo anterior, e datum tabata fout, pasobra el a mustra cu e mensahe a wordo manda 22 di december 2010 pa 10 di mainta. E fiscal ta bisa NFI via email riba 9 di september cu mas tanto nan lo ta interesa den e mensahenan di 23 di december (pues den ora di Aruba, e mensahenan di 22 di december).

Como reaccion riba e peticion di Wob, un articulo di corant (nr. 27 riba e lista di documento duna) a wordo duna, unda ta mustra cu OM a manda mas material pa NFI investiga. E informacion aki sinembargo no a aparece den NFI su buskeda, maske a pidi pa tur cos regardando e investigacion den cuadro di asesinato di Castro. E periodista a tuma contacto cu NFI, y a splica cu pa via cu a busca uzando e number di caso cu e prome investigacion tabatin (riba e BlackBerry), no a haya e documentonan riba e otro investigacion, esta riba DNA cu OM a manda Hulanda. Esaki pasobra nan a boek e investigacion di DNA riba otro number di caso. NFI a duna disculpa y a indica cu ta buscando e resto di e documentonan cu no a wordo haya den cuadro di e peticion.

Pronto lo bin mas documento di parti di Hulanda, pero turesten e periodista a entrega un peticion pa documentonan (Lob) na Ministerio di Husticia di Aruba pa asina haya tur documento, corespondencia, etc. den cuadro di e investigacion penal riba asesinato di Poentje Castro. Mester remarca cu den cuadro di e peticion, NFI a pidi OM na Aruba pa nan bista si e documentonan pidi mester wordo haci publico. riba cual OM a contesta cu nan no tin ningun problema den cuadro di investigacion penal, ni pa cualkier otro rason. Si ministerio di Husticia of OM lo honra e peticion, al contrario na un peticion anterior cu Minister di Husticia a ignora pa 1 aña y mei, lo mester mira ainda. E documentonan cu NFI a publica despues como reaccion riba e peticion di Wob ta disponibel riba https://www.forensischinstituut.nl/over-het-nfi/organisatie/wob-verzoeken/wob-verzoek-inzake-castro