Gobierno Mericano a anuncia dialuna cu lo otorga Status Protegi Temporal na Venezolanonan cu ya ta na Merca, permitiendo alrededor di 320mil persona aplica pa biba y traha legalmente na e pais durante 18 luna. E movida, cu ex-presidente Donald Trump a resisti, tabata bon ricibi pa inmigrante-, defensor-, y legisladornan, algun di ken a introduci un medida cu e mesun meta.
Mester duna prueba di residencia continuo y pasa un chekeo criminal pa cualifica pa e status. Venezolanonan mester a yega prome cu dialuna pa wordo considera pa e programa. Esnan eligibel pa aplica ta inclui persona cu tin un caso di asilo pendiente y esnan kende nan solicitud di asilo a wordo rechasa pero nan a keda na Merca.
Venezuela ta hundi den un profundo crisis politico, social y economico atribui na caida di prijs di petroleo y dos decada di mal maneho di gobierno socialista.
Hopi di esnan cu a emigra na Merca a aplica pa asilo, pero huy di un crisis humanitario no ta resulta automaticamente den aprobacion di un caso di asilo na Merca. Mas di 50% di solicitud di asilo di Venezolanonan a wordo rechasa durante ultimo añanan, segun Michael Kagan, profesor di ley y director di e clinica di inmigracion na Universidad di Nevada Las Vegas.
Riba su ultimo dia como presidente, Trump a duna un orden diferiendo deportacion cu 18 luna pa mas di 145mil Venezolano. Republicanonan den dianan recien a urgi administracion di Biden pa formalisa e orden ehecutivo di Trump, pero e Status Protegi Temporal otorga dialuna ta duna inmigrantenan un status mas formal cu no por reverti asina facil.
