Aeropuerto di Dubai, un di esnan mas druk pa biahe internacional, por sinti surreal cu su tiendanan cavernoso, palma artificial, terminalnan briyante, cascada di awa y nivelnan casi Artico di airco.
Awo, e hub clave di transito oriente-occidente ta lansando otro adicion di e mundo di cienci ficcion – un scanner di iris cu ta verifica identidad di un persona y ta elimina e necesidad pa interaccion humano na momento di drenta of sali for di e pais.
Ta e programa di inteligencia artificial (AI pa su siglanan na Ingles) cu Emiratonan Arabe Uni (UAE) a lansa memey di e pandemia di coronavirus, un tecnologia sin contacto cu gobierno ta promove como un ayudo pa combati transmision di e virus. Pero e esfuersonan tambe a renoba preguntanan tocante vigilancia masal den e federacion di shete ‘sheikhdom’, cual expertonan ta kere tin e concentracion di camara di vigilancia per capita entre e mas halto na mundo.
Aeropuerto di Dubai a cuminsa ofrece e programa na tur pasahero luna pasa. Diadomingo, biaheronan a acerca un scanner di iris despues di check in, a mir’e, y a pasa door di control di paspoort den algun seconde. Den olvido a keda e dianan di ticket di papel of app di celular.
Den añanan recien, aeropuertonan rond mundo a acelera e uso di tecnologia di tempo di cara – cu ta scapa tempo – pa move pasaheronan na nan vuelo. Pero e scan di iris di Dubai ta mehora riba Gatenan automatisa comun tur otro caminda, autoridadnan a bisa, conectando e data di iris na e base di dato di reconocemento di cara di e pais, pa asina e pasahero no mester documentonan di identificacion ni boarding pass. E asociacion inusual entre e aerolinea di distancia largo Emirates, propiedad di un fondo soberano di Dubai, y e oficina di migracion di Dubai, ta integra e datonan y ta hiba e biaheronan for di check-in te subi avion di un solo biaha, nan a agrega.
“Futuro ta yegando”, segun Gen. Mayor, Obaid Mehayer Bin Suroor, director interino di Directorado General di Residencia y Asuntonan Stranhero. “Awo tur procedura a bira ‘smart’ alrededor di cinco pa seis seconde.”
Pero igual na tur tecnologia di reconocemento di cara, e programa ta agrega na miedo di desaparicion di privacidad na e pais, cu a enfrenta critica internacional pa ataca periodista y activistanan di derechonan humano.
Segun declaracion di privacidad biometrico di Emirates, e aerolinea ta vincula e cara di e pasaheronan cu otro datonan di identificacion personal, incluyendo informacion di paspoort y di vuelo, reteniendo esaki ‘tanten cu ta rasonablemente necesario pa e propositonan pa cual a colect’e’. E acuerdo a duna tiki detaye riba con lo usa y warda e data, apart di bisa cu mientras e compania no a saca copia di cara di e pasaheronan, otro data personal ‘por wordo procesa den otro sistemanan di Emirates’.
Bin Suroor a insisti cu oficina di inmigracion di Dubai ta ‘protege completamente’ e datonan personal di e pasaheronan pa asina ‘ningun tercero por mir’e’.
Pero sin mas informacion riba con lo usa of warda e data, tecnologia biometrico ta inclui e posibilidad di maluso, expertonan ta bisa.
“Cualkier forma di tecnologia di vigilancia ta preocupante, sin importa ki sorto di pais e ta aden”, segun Jonathan Frankle, un studiante posgrado di inteligencia artifical na Massachusetts Institute of Technology. “Pero den un pais democratico, si ta usa e tecnologia di vigilancia transparentemente, al menos tin oportunidad di tin un combersacion publico riba esaki’.
Scan di iris, cu ta rekeri pa hende mira den un camara comosifuera nan ta ofreciendo un fingerprint, a bira mas comun mundialmente den añanan recien, mientras preguntanan a bin dilanti tocante e precision di tecnologia di reconocemento di cara. Biometrica di iris ta considera mas confiabel cu camaranan di vigilancia cu ta scan cara di hende for di un distancia sin nan conocemento of permiso.
A pesar di preocupacion tocante vigilancia sobre-entusiasta den UAE, e red amplio di reconocemento di cara di e pais ta mustra solamente señalnan di expansion. Luna pasa, prome minister Sheikh Mihammed bin Rashid Al Maktoum, kende tambe ta sirbi como gobernante di Dubai, a anuncia cu e pais lo cuminsa test tecnologia di reconocemento di cara nobo, pa reduci documentonan den ‘algun servicio di sector priva’, sin elabora.
Durante e pandemia, e ciudad di Dubai a avansa un cantidad di herment tecnologico pa combati e virus den centronan comercial y riba caya, incluyendo camara termal, desinfectantenan, y scan di cara cu ta check pa tapaboca y tuma temperatura. E programanan similarmente ta usa camaranan cu por graba y upload data di persona, potencialmente hincando e informacion den e basenan di dato mas amplio di e ciudad estado.
