Minister di Finanzas y Asunto Economico, Xionmara Maduro a declara cu Fondo Monetario Internacional (IMF) den su ultimo rapport emiti ayera pa premira cu pa 2021 nos lo yega un pik di 130% di nos debe, y despues e ta cuminsa baha.

Den e caso aki IMF ta menciona cu den e proceso di recuperacion y restructuracion di e debe nacional mester inclui un parti caminda mester converti algun di e debenan den un regalo pa pais Aruba.

Situacion di debe

E sosten financiero cu a wordo duna di Hulanda tabata esencial pa salba bida di hende, tambe pa genera entrada pa cantidad di famia. Pero di otro banda e ta subi e debe di nos pais. Y esaki a keda indica den IMF su rapport. “E debe ta keda un risico grandi pa pais Aruba,” e mandatario a declara.

Segun e minister encuestion e situacion aki ta exigi un prudencia riba nan maneho financiero. Prome cu Covid caba gobierno tabata atende cu e debe creciente. IMF ta indica cu Aruba tabata trahando pa baha esaki. Den 2019 e debe relata na nos crecemento tabata na 72%. Pero Covid a yega y gobierno mester crea mas debe pa atende cu necesidad di nos comunidad.

Den 2020 e debe relata na nos GDP a bay te 117%. Pa 2021 IMF ta relata den un rapport cu ta wordo premira cu debe di pais Aruba -relata na nos crecemento (GDP)- ta yega na un pik na 130%. Tur esaki ta trece un peso cune -segun minister Maduro- cu gobierno ta bay traha riba dje. Despues di esaki IMF ta premira cu e debe lo bay baha.

Sosten financiero y recuperacion

Tambe IMF ta keda menciona cu ta importante pa gobierno por sigui duna e sosten financiero, entre nan di subsidio di salario y FASE, pero tambe e sosten pa companianan chikito y mediano. Igualmente e alivio fiscal pa sigui dun’e den termino cortico y mediano.

E sosten financiero for di Hulanda ta bay yuda nos pa e proceso di recuperacion economico cu IMF ta premira cu ta cuminsa den 2021. Den e di tres y cuater kwartaal di e aña aki, IMF ta mira recuperacion pa pais Aruba. Esaki lo wordo refleha pasobra turismo lo bini bek. Tambe nan ta premira cu Merca su situacion lo drecha creando mas cupo di trabao. “Esaki mas cu claro ta trece cune e oportunidad, pasobra di eynan mayoria di turista bin,” minister Maduro a bisa.

Aruba su capacidad pa test pa detecta e virus, pero tambe di por brinda vacuna ta keda factornan importante den e proceso di recuperacion di nos economia nacional. Pero logicamente e “acuerdo cu Hulanda ta keda esencial no solamente pa duna sosten financiero, sino pa Aruba por yega bek na un nivel di debe sostenibel.

Otro aspecto tin di haci cu Aruba su infrastructura a keda intacto apesar di e pandemia. Aruba ta un producto turistico excepcional. E mandatario ta kere cu nos tin tur cos na nos fabor pa reactiva economia di nos pais.

Den rapport di IMF ta wordo menciona pa e yudansa financiero mester keda duna for di Hulanda. Esaki ta wordo poni den e punto 8 di e rapport aki, caminda e instituto internacional aki ta mira cu e yudansa aki ta habri espacio pa refinancia. E mandatario ta haya cu esaki ta un di e posibilidad cu nan a percura, ora cu nan a negosha cu Hulanda.

IMF su rapport riba punto 10 ta bisa cu si ta wordo kita e yudansa financiero (di Hulanda) prematuramente, esaki lo por stroba e recuperacion. Y te hasta lo por pone ainda un peso mas grandi ariba economia di pais Aruba.

Den e punto 11 IMF ta pidi cautela tambe pa locual ta e recorte den AZV. Un punto cu a trece hopi discusion riba dje y cu IMF ta indica cu mester tin cautela cu e cortamento di locual ta salubridad su riesgo pa ser humano y tambe pa economia cu Covid-19 ta trece cune.

El a bisa cu un aña despues gobierno a cuminsa negosha caba pa refinancia cu Hulanda riba e debe cu internacionalmente, pais Aruba a subi mercado internacional. Pero awor nan ta haci’e via Hulanda, y e ta crea un forma pa restructura e debe aki. Pero den IMF su relato nan ta considera prudente pa trece esaki dilanti, entre nan converti parti di nos debe den regalo. Pero e ta un parti cu gobierno mester sigui negosha cu Hulanda, segun minister Maduro.