Minister di Desaroyo Internacional di Canada, Karina Gould, a adverti diabierna ultimo den un entrevista cu e agencia noticiero EFE, cu e exodo Venezolano ‘por converti den e mayor crisis migratorio na mundo pa fin di aña’, y a solicita sosten internacional pa e paisnan cu ta acoge e migrantenan di e nacion aki, den e proximo Conferencia Internacional den Donantes en Solidaridad con los Refugiados y Migrantes Venezolanos.
Canada, cu lo celebra e conferencia dia 17 di juni proximo, ta tuma over for di Spaña, cu a organisa esaki aña pasa cu sosten di Union Europeo (UE), Agencia di Nacionnan Uni pa Refugiado (ACNUR) y Organisacion Internacional pa Migracion (OIM).
Gould, ken diabierna a conclui un bishita virtual na Colombia durante cual el a reuni cu representantenan gubernamental, di sector priva y organisacionnan di desaroyo, a anuncia cu Canada lo destina 29,5 miyon di dollar Canades (23,3 miyon dollar Mericano) na seis proyecto destina pa alivia e efectonan di e pandemia den areanan di educacion, sosten na e proceso di paz, como tambe empoderamento di muhe y hobennan den areanan rural.
E minister Canades a señala cu ‘e crisis migratorio di e Venezolanonan, principalmente den e region andino, por converti den e mayor crisis migratorio na mundo pa fin di aña aki. Tin mester y ta rekeri un respuesta y sosten financiero di parti di mundo pa yuda e paisnan cu ta ricibi e migrantenan. Un respuesta multilateral ta fundamental.”
Gould a bisa cu ainda no a logra comunica cu administracion di presidente Mericano, Joe Biden, pa trata tocante e crisis Venezolano, pasobra su contraparte no a wordo confirma na su cargo.
