Redaccion di Bon Dia Aruba a acerca sra. Grace Maduro den cuadro di e entrevistanan cu nos a tene relaciona cu Dia Internacional di Hende Muher, pa scucha di su persona con e ta mira e desaroyonan na Aruba, cu tin di haci cu posicion di hende muher den nos sociedad y economia.
Grace Maduro, na 60 aña di edad, tin un carera amplio su tras, tanto den sector (semi)publico como priva. El a cuminza den Recurso Humano na gobierno, tabata hopi aña manager di Recurso Humano di Hospital, a traha como consultora cu KPMG y a bira gerente di e empresa mas grandi di Aruba den landscaping, como co-propietario. Banda di esey e ta miembro di Beheerraad di Corte di Husticia y ta actualmente activo den coordinacion di Sociaal Crisis Plan y ta envolvi tambe den e proyecto Leerorkest, cu ta hiba educacion musical na nos scolnan. Banda di tur esaki, e ta hibando su bataya personal cu cancer.
BDA: “Un promer pregunta tabata tocante bo experiencia cu trabao den ambos sector. Tin diferencia clave entre sector publico y sector priva pa e manera cu ta trata hende muher?”
Grace: “Realmente actualmente mi no ta mira tanto diferencia. Den pasado gobierno tabata paga hende muher menos pero esey nos a laga leu nos tras. Den sector priva, unda hopi di e empresanan mas grandi tin un estilo di management basa riba e cultura empresarial Mericano, e enfasis ta mas riba si bo ta capaz di eherce e job, y esey ta automaticamente mara na cierto pago. Unda si por tin desigualdad ta con facil, of no, un hende muher ta yega na top. Mester bisa cu nos ta carece di bon research riba e tereno aki. Loke si nos por bisa cu den ultimo tempo nos ta mira mas tanto hende muher cu bon educuacion ta penetra den top di gobernacion y empresanan. Esey lamentablemente tin relacion tambe cu e hecho cu e studiantenan masculino pa un parti importante no ta caba nan estudio, cu resultado cu e presencia di hende muher cu estudio superior a bira hopi mas fuerte. En todo caso, na e momento aki por mira cu hopi mas hende muher ta yega na top den ambos sector, basta cu banda di bon scol nan ta dispuesto di ‘go the extra mile’ pa yega na nan meta. Y ya cu den hopi caso nan ta keda mas tanto cu e responsabilidadnan di hogar tambe, esaki ta un extra peso pa nan.”
“Sin embargo, e tendencia positivo aki di mas muher na top no ta e unico cos cu nos ta mira. Loke pa mi ta preocupante ta e falta di liderazgo cu bo ta mira tanto den sector publico como priva, mas fuerte si den e promer menciona. Esaki tin di haci cu e forma con e poder politico ta obliga e aparato opera, unda scoge pa lider fuerte na e departamentonan no ta un prioridad, al contrario. Pero mas en general tambe, bo por duna hende yen di curso di management, pero ta nan mes mester tin e den nan pa mustra e iniciativa y audacia cu esaki ta exigi, y esey ta falta hopi. Esey ta hiba nos naturalmente tambe na e forma con nos ta educa nos hubentud, unda no tin enfasis riba pensa pa bo mes y mustra iniciativa.”
BDA: “Banda di bo responsabilidadnan multiple bo a bin topa tambe cu e enfermedad cu nos tur ta teme, cancer. Con el a afecta bo y e cosnan cu bo ta desea di haci? Nos ta ripara cu bo ta hopi activo, a pesar di tur cos.”
Grace: “Naturalmente bo ta pasa den tur e mal momentonan cu un pacient di un enfermedad asina serio ta pasa. Bo ta realisa bo cu bo bida no ta terminando talvez inmediatamente, pero cu e ta terminable; un dia bo no t’ey mas. Un di e cosnan cu si mi a haci inmediatamente ta entrega e yabinan di e compania na mi yiunan, cu ta comparti e gerencia awor. Pero mi a keda cu mi responsabilidadnan como miembro di Beheerraad di Corte Comun di Husticia, algo cu mi ta considera un honor, y recientemente mi a ser acerca pa duna un contribucion na e Plan di Crisis Social, loke mi a acepta tambe. Logico cu bo no por haci tur cos bo mes, bo mester tene cuenta cu bo condicion y ta importante pa defini kico si bo ta haci ainda y kico otro hende lo mester haci. Bo mester siña maneha bo tempo di un manera cu bo no a pensa te awor. Pa loke ta e plan di Crisis, esey ta un tema cu riba su mes bo por papia henter un dia ariba. Laga mi bisa cu falta hopi trabao pa haci ainda, sigur riba tereno di coordinacion y comunicacion entre entidadnan, y mas cu tur cos cu e confianza cu mester ta e base mutuamente.”
BDA: “Tambe bo ta envolvi completamente cu e proyecto di musica ‘Leerorkest’ cu proximamente ta haya un ampliacion grandi cu e acceso na e scolnan di SKOA. Otro pasion di bo?”
Grace: “Si, pero aki tambe, bo mester haci loke bo por y confia riba e trabao cu otronan ta haci. Educacion y forma pa prepara nos hobennan pa nan futuro conoce diferente forma, y musica sigur ta algo sumamente importante. E ta siña mucha cu ta bon cu e ta expresa su mes, y ta un di e rutanan via cual un hoben ta siña haya confianza den su mes. Nos tin un tremendo apoyo di Hulanda unda e proyecto a origina, pero finalmente nos mester haci e trabao duro aki, ya ta logrando.”
“Finalmente, bolbiendo na e tema di liderazgo. Ser lider ta significa papia sin miedo y indica e rumbo pa bay. Nos mester educa nos hubentud pa pensa y actua sin miedo, y pa esey un ambiente sano y sigur den nan hubentud mester ta un prioridad. Como sociedad, nos mester siña deal cu nos problemanan pa nos por cura; ta pesey problema manera abuso di mucha no por keda scondi y mester atende esaki activamente.”
