Gina Maduro ta un profesional den enfermeria kende pa 10 aña caba ta presidente di sindicato di e trahadonan di enfermeria, AVB.

E ta traha na servicio di Horacio Oduber Hospitaal (HOH), unda e ta labora den Departamento di Emergencia. E ta un departamento hopi druk cu ta exigi hopi di bo tambe. E tin casi 30 aña trahando den HOH. Pero di otro banda, e tin rond di 20 aña den sindicalismo, pasobra e tabata prome representante sindical den varios departamento di hospital.

Vocacion sindical

Sindicalismo a bira un pasion pe for di tempo di mucha. E presencia den su bida di un tata sindicalista, Sr. Raymundo Maduro (d.f.m) kende a forma parti activo di sindicato di gobierno GABA a influencia Gina pa bay riba e mesun rumbo aki. Ainda e ta conserva e recuerdo di su tata den oficina, caminda Gina tabata sinta den skina pa kleur y su difunto tata tabata reuni cu su coleganan. “Mi difunto tata a inspira mi,” el a bisa.

El a cuminsa prepara pa bira un lider sindical. El a bay diferente curso di formacion y guia, te ora cu Gina a drenta e directiva mes di ABV.

E ta bisa su condicion di hende muhe no a strob’e pa logra su meta como profesional den enfermeria y tampoco como sindicalista. E no a sinti esey, al contrario e ta sinti cu como lider sindical su condicion di ser femenino a yud’e hopi.

“E ta forma bo! Tambe e ta yuda bo hopi pa bo ta sigur di bo mes,” el a declara.

Satisfaccion profesional y sindical

Como trahado di enfermeria – cu ta un sector domina pa hende muhe – tampoco su condicion di ser femenino no a strob’e pa e sigui scala. Sinembargo el a bisa cu e trabao di enfermeria ta bay a base di bo estudio. Pues unabes cu bo tin bo estudio como trahado, niun hende por stroba bo pa bo wordo promovi.

E tin tres decada trahando den hospital, y e ta sinti cu como profesional, el a crece durante tur su experiencia den enfermeria, caminda el a wordo specialisa tambe.

Gina ta satisfecho cu locual el a logra conkista riba ambos tereno. For di 2011, ora cu el a wordo eligi como presidente di sindicato ABV a confronta diferente reto, entre nan negociacion di varios contracto colectivo (CAO). Pero e ta mira cu e sindicato ABV a crece den miembresia tambe.

E dia cu el a bira presidente di ABV tabata solamente trahadonan di enfermeria di hospital tabata nan miembronan. Pero nan a expande nan halanan y pa 2015 trahadonan di IMSAN a drenta como miembro di ABV, y na caminda e trahadonan di e casnan di cuido di fundacion SABA tambe a bira nan miembronan, y te ainda nan tin presencia den SABA. Igualmente ABV tin presencia den Stichting Respaldo cu ta e ex empleadonan di PAAZ; y tambe na Bloedbank.

Como hende muhe no ta facil pa asumi e rol di lider sindical. E ta reconoce cu e funcion aki tin su retonan cune. Pero e ta haya cu e no tin di haber si ta hende muhe of hende homber, sino cu e trabao di sindicato ariba su mes no ta facil. Pasobra lamentablemente e ta un sorto di trabao cu kico bo a haci pa bo miembronan, tog bo no ta logra complace tur hende.

“Pero bo tin cu wak cu e mayoria si ta bo tras,” el a declara durante e entrevista aki cu Bon Dia Aruba den cuadro di Dia Internacional di Hende Muhe.

Balans entre trabao y famia

Sindicalismo ta un trabao cu ta exigi hopi di bo. Como sindicalista bo mester ta 24X7 practicamente. Nan ta traha cu miembronan cu ta traha diferente turnonan, y tambe cu nan diferente retonan y problemanan laboral, y te hasta personal cu nan ta purba di guia nan. Vooral den e situacion actual cu no ta facil, nan tin cu educa nan miembronan.

“Nos ta den pleno crisis di e pandemia aki, unda ta dificil pa bay negosha. Negociacion t’ey pa purba di mantene locual bo tin caba,” el a bisa.

E hecho cu Gina Maduro mester cumpli cu su trabao tambe ta haci’e menos facil, y mas sacrificio personal y familiar. No ta facil pe balansa un trabao como enfermera y sindicalista cu su bida personal. Pero tog e ta purba di balansa y esaki ta depende di bo mes como hende. Ora cu e trabao ta exigi hopi di bo, bo tin cu trece e balansa, pasobra “si bo no por trece e balansa ey, e ta desbalansa bo.”

E no ta facil, pero mester busca e forma cu ora di trabao ta trabao, pero ora di sosiego bo tin cu tuma bo descanso tambe. Por ehempel un diasabra 10’or di mainta si e no ta trahando, e ta na cas. Y loke e ta haci regularmente ta sigui tur sorto di noticia local, regional y internacional. Como lider sindical e ta haya cu bo mester ta bon informa. E ta gusta lesa bukinan y tambe e ta gusta wak e cursonan di formacion cu por yud’e pa mehora su mes. Igualmente den su tempo liber e ta gusta bay lama cu su famianan y purba ta social cu su hendenan.

Mensahe

P’esey pa e generacion nobo di e trahadonan cu ta drenta den mundo di enfermeria, pero tambe pa esunnan cu kier bira un lider riba cualkier tereno, Gina Maduro su conseho ta pa no laga cu bo condicion di ser femenino no stroba bo. Alcontrario e ta mira cu awendia mas y mas hende muhe ta resalta, y e ta keda tog un reto. “Nos hende muhenan a demostra cu nos por!.”el a bisa.

Na final, Gina Maduro ta desea tur ser femenino mundialmente y na Aruba, un feliz Dia Internacional di hende Muhe. E dia special aki ta uno unda henter mundo ta para keto y concentra riba ser femenino.

“Mi ta kere cu nos tur tin bo casa, bo mama, bo ruman muhe, bo yiu muhe, pues ser femenino ta bunita, y nos tin cu respeta ser femenino y duna nan balor,” asina el a pone punto final na nos entrevista.