Pa conmemora Dia Internacional di Hende Muhe: Awe tardi lo tuma luga e actividad “Camina en Rancho”

Ayera atardi, Stichting Rancho durante un conferencia di prensa a duna di conoce cu awe den oranan di atardi lo celebra e Dia Internacional di Hende Muhe di un manera hopi special den e mesun area di Rancho.

Asina a duna di conoce Ginelly Quandt cu ta boluntario di Stichting Rancho na unda el a informa riba e campaña di conscientisacion den marco di celebracion di Dia Internacional di Hende Muhe conhuntamente cu otro tres organisacionnan como Oficina di Alto Comisionado di Nacionnan Uni pa Refugiado (ACNUR), Organisacion Internacional pa Migracion (OIM) y HIAS Aruba.

El a menciona cu nan como fundacion kier trece e campaña aki pa area den bario di Rancho hunto cu e organisacionnan aki pa asina e comunidad por conoce nan y haya sa kico nan ta haci , ta trata di un actividad awe desde 4or di atardi te cu 7or di anochi cu ta yama “Camina en Rancho” cu e presencia di diferente boluntario cu lo pasa den su cayanan pa por duna informacion y con por yuda esunnan mas vulnerabel.

“Manera semper nos porta semper ta habri pa traha cu organisacionnan local den e parti di conscientisacion di derecho di hende muhe pero tambe di tur otro derecho”Quandt a comenta.

Carolina Bedoya protection assistent di (ACNUR) a bisa cu nan tambe lo celebra e rol di hende muhe den sociedad, den barionan y den comunidad, esunnan cu ta lucha grandemente pa haya igualdad den sociedad.

Asina mes, el a expresa cu specialmente na e momentonan aki na unda pandemia Covid-19 hende muhe a sigui hunga un rol fundamental den e lucha aki, na momento cu medidanan a wordo implementa cu lockdown, asina como tambe e perdida di trabou y e dificil situacion economico, e desigualdad y posicion vulnerabel di hende muhe a keda hopi mas visibel.

Pa e motibo aki, “ACNUR ta hopi orguyoso di colabora cu Stichting Rancho, HIAS y OIM pa haci e actividad aki pa nos hunto cana den bario pa asina crea conscientisacion riba e rol cu hende muhe tin den sociedad y tambe ofrece un tiki di asistencia cu nos organisacionnan ta brinda pa personanan vulnerabel den nos isla”, Bedoya a informa.

Ta nan deseo pa nan lo sigui traha hunto cu Stichting Rancho incluyendo otro organisacionnan cu ta lidera door di hende muhe pa asina trece e progreso den e participacion den comunidad y hende muhe den nan proyectonan, hunto nan ta desea di logra igualdad den acceso na educacion, trabou, salud y servicionan legal.

Bedoya a menciona cu pa e motibo aki nan ta haci un yamada na e comunidad pa participa den e actividad aki pa asina busca igualdad den hende muhe den sociedad.

Adaylin Gonzalez assistent di proyecto di OIM a trece dilanti cu loke nan ta desea di logra cu comunidadnan rond di mundo conhuntamente pa por crea un mundo di igualdad trahando den e eliminacion di formanan di discriminacion, violencia y abuso cu ta disminui e derecho di hende muhe.

Pa cu esaki, door di ofrece un miho educacion of miho oportunidadnan economico den nan comunidad y den nan siguridad pa por evita conflictonan y desaster unda cu hende muhenan semper ta wordo forsa pa momentonan di violencia of conflicto.

Gonzalez a splica cu hende muhe normalmente ta e prome contesta den comunidad pa loke ta trata momentonan di disaster of trabou di paz pa traha den forma di igualdad, nan ta contribui na e sabiduria y e conocemento cu nan hermentnan pa asina tene un comunidad mas resiliente.

“OIM ta reafirma nos compromiso pa sigura cu como hende muhenan y muhenan hoben ta den e direccion pa nan sinti nan mes protegi, salvaguardia di e risiconan, pa encurasha nan pa por bira lider den comunidad” Gonzalez a bisa.

Di parti di HIAS Aruba , Suekyem Croes trahado social y counselor a declara cu awe 8 di maart ta un dia cu globalmente ta wordo celebra y nan lo bay haci cu e hashtag #Chooseyouchallenge, nan di HIAS ta honra pa comunidad pa asina trece un cambio den e parti di violencia y desigualdad pa hende muhe.

Sin discrimina, sin lubida y sin pone enfoke riba nan alrededor, nan nacionalidad, nan edad, nan colo di cuero y otro aspecto, nan ta pone focus riba empodera esun individualnan, nan ta pone e focus riba cambio y asina trece un miho mundo.

Cu e guia di algun SDG’s cu ta e goalnan sostenibel mundial nan tambe ta pone nan grano di arena y accion pa hunto cu nan partner como OIM, ACNUR ademas di Stichting Rancho awe pa cana den bario y laga nan bosnan resona pa atrae tur hende muhe hunto y tambe esunnan di otro genero pa sostene e challenge cu nan tin, pa loke ta trata e parti laboral, economico, socio-politico, emocional y otro.

“Nos ta eynan pa duna sosten pa nos clientenan y tur esunnan cu tin mester”, Croes a afirma.

Pa finalisa, Ginelly Quandt di Stichting Rancho a trece dilanti cu ora cu Centro di Actividad Rancho a wordo cuminsa na 2016 nan semper ta haya hende cu ta drenta den centro cu mester di ayudo, algo cu loke el a sigura cu tin biaha cu algun di nan ta refugiado of ta bin for di paisnan latino cu na e momento ey nan mes como boluntario no tin e habilidad pa atende cu nan problema.

Loke nan ta purba di haci aworaki ta un colaboracion cu e organisacionnan grandi aki cu ta enfoca specificamente riba e refugiadonan y cu nan por siña for di nan tambe pa den futuro ora nan lo haya hende cu tin necesidad nan por dirigi nan cerca e organisacionnan aki.

“Ta sumamente importante pa bario di Rancho, pasobra di e cantidad di hende cu Aruba tin un porcentahe di nan no ta e Arubiano tradicional, nan ta bin di afo”, el a comenta.

Nan mes a haci un encuesta cu e resultadonan ta mustra cu e comunidad ta multicultural, esey kiermen cu nan mester atende cu tur hende sea di na unda nan ta bin, nan tin cu atende cune