Hobennan di Boneiro, Sint Eustatius y Saba cu ta bay studia na Hulanda Europeo for di e aña escolar binidero, por conta cu un Opstarttoelage y guia gratis den e prome aña di estudio. E Opstarttoelage ta consisti di un beca di prestacion di un biaha di $2,761.72 y fiansa maximo di $5,523.44 y esaki ta destina pa yuda paga, por ehempel, pasashi, meubels pa camber, ‘overbrugging’ y guia na Hulanda.
Studiantenan por ricibi guia gratis durante e prome aña via RCN-Studiefinanciering. E guia aki ta consisti di entre otro, organisa un vuelo den grupo pa Hulanda, acogida na Schiphol y un pakete di seguro adicional pa e studiante ta sigura na Hulanda. Aparte di esey, studiantenan di Hulanda Caribense ta ricibi guia di un mentor durante e prome aña. E mentor ta yuda cu entre otro inscripcion na e munisipio, haci peticion pa un ‘Burger service nummer’ y habri un cuenta di banco. Ademas di e servicio di guia, studiantenan por haci uzo di e servicio di alohamento. Esaki ta nifica cu e supervisor lo haci tur cos posibel pa haña un alohamento adecua pa e studiante na Hulanda.
Registra prome cu 1 di april
E Opstarttoelage ta conta pa studiantenan cu ta sigui un estudio full-time riba nivel mbo 3 of 4, hbo of universidat na Hulanda Europeo. Un studiante por aplica pa e Opstarttoelage si e ta bin na remarca pa DUO Studiefinanciering tambe. E peticion pa Opstarttoelage inclui guia, mester ta aden prome cu 1 di april. Pa haci esaki, e studiante por haci uzo di e formulario riba website di RCN-Studiefinanciering: www.rijksdienstcn.com/opstarttoelage.
