Departamento di Salud Publico na mas cu un ocasion a informa cu e test di COVID-19 no ta wordo ehecuta pa nos servicio. E test di COVID-19 ta wordo ehecuta pa diferente laboratorionan rond Aruba.
Si bo persona ta residente y tin sintoma di COVID-19 bo persona mester tuma contacto cu dokter di cas y dokter di cas lo informa laboratorio di hospital cu bo persona mester un cita pa test. Laboratorio di hospital na su turno lo tuma contacto cu bo persona pa un cita pa test.
Si bo persona ta un turista of un local cu ta biahando y pa motibo di biahe bo mester haci un test. Pa cu esaki bo mester tuma contacto cu un di e numbernan aki 597-4522/ 280-0630/ 592-0709. E test pa por biaha tambe ta wordo ehecuta pa laboratorio y no DVG.
Un suplica grandi ta bay na comunidad. Si bo persona a tuma contacto cu dokter di cas y e la informa bo persona cu bo mester test. Si bo no ricibi yamada pa test, tuma contacto cu bo dokter di cas un bes mas y informe esaki. DVG ultimo dianan ta ricibiendo masha hopi e-mail y yamada di comunidad pa haci test di COVID-19 y DVG no por yuda cu esaki. Un bes mas nos kier aclaria cu e proceso aki no ta resorta bou di nos servicio y pa es cu yama laga mensahe of e-mail nos simplemente e proceso pa e persona por test lo tarda mas ainda.
