Manera a keda conoci diahuebs ultimo, un biaha mas sector di enseñansa a bay den accion pa asina entrega un manifiesto y segun di Sindicato di Maestro SIMAR, nan ta warda riba contesta pa cu esaki te diamars 9 di maart.

Bon Dia Aruba a tuma contacto cu Josephine Albertus presidente di e sindicato aki y el a splica cu nan a manda un manifiesto cu ta bisa cu Minister di Enseñansa Armando Rudy Lampe tin te dia 9 di maart pa informa nan y detene e fusering.

Den un reunion cu nan, Prome minister Evelyn Wever-Croes a bisa cu e lo traha riba dje, minister di Enseñansa segun Albertus a indica a duna di conoce cu tur cos ta bay door “e no ta worry cu nada” y loke nan a haci ta cu awor nan a pone den man di prome minister esey y tambe a bay Parlamento na unda cu nan a entrega e mesun manifiesto.

Nan tambe a puntra si por wordo haya un bijeenkomst unda cu nan por duna un splicacion y e mester ta un pa full un pueblo por scucha, den e caso cu nan no lo haya e contesta cu nan ta espera door di minister Lampe e maestronan lo sigui tumando accion.

Di mesun manera, Albertus a splica cu diahuebs ultimo tambe nan a haci un reunion informativo cu mayornan y eynan e docentenan a splica cu no ta e caso cu nan no kier innova ni tampoco cu nan no kier e fusering pero actualmente a pone dos cos den otro y tin otro factornan cu tin cu tene na cuenta cune, “pero minister no ta tene cuenta cu nada”, el a sigura.

Na e momentonan aki, Albertus a menciona cu e docentenan no tin claridad y esey ta docentenan di tur e dos scol, mayornan no tin claridad pa motibo cu segun e, minister Lampe a bisa cu el a duna un carta y eynan a wordo bisa cu ta bay tin fusering y despues lo bin cu mas informacion, pero “mayornan tambe ta responsabel pa su yiu y nan tambe kier sa kico ta bay pasa”, el a comenta.

E caso aki ta trata di Emmaschool y Scol Paso pa Futuro na unda nan tin cu bay hunto y e ora ey scol Paso pa Futuro ta bay Emmaschool su localidad, loke minister Lampe kier ta pa scol Reina Beatrix bay den edificio di Paso pa Futuro pa motibo cu scol Reina Beatrix awor ta un scol cu a wordo poni na tres localidad.

“E kier pa nan tur ta den un edificio”, Albertus a sigura.

E plan ta pa uni ambos scol pa nan bira uno bou e nomber di Scol Soeur Juliette. Ya caba un plan a wordo traha pa drecha infrastructura di Emmaschool pa e bira hunto cu Paso pa Futuro un solo scol den honor di soeur Juliette kende a dedica hopi aña di su bida na enseñansa

Pa e motibo aki, segun Albertus minister Lampe ta keda insisti den scol Paso pa Futuro cu a cuminsa cu e situacion aki for di aña pasa pero awor loke el a haci manera el a afirma ta cu a move hopi docente pa motibo cu den aña escolar aki shete docente caba a wordo hala na otro caminda, tambe el a bisa cu a kita muchanan di 13 aña bay ariba declarando cu nan mester bay SPO debi cu e ley ta regarda esey.

“Pero si bo wak e ley di Aruba e ta bisa bo cu mucha por keda te cu 15 aña y si mayor ta haci un peticion, e mucha por keda te un tempo mas largo”, Albertus a declara.

Ademas, el a trece dilanti cu tur e situacion aki ta facilita e plan di minister Lampe, “e ta purba di kibra scol anto despues e ta hustifica cu scol ta mucho chikito y no por keda den edificio”, el a expresa.

Den su opinion, Albertus ta haya straño cu tin un scol cu tin añanan funcionando y den un par di luna ya caba shete hende a bay, e ora ey algo no ta cuadra manera Albertus a expresa.

Di otro banda, tambe den un otro edicion di Bon Dia Aruba di algun dianan pasa a wordo treci dilanti e situacion cu algun personanan den area di enseñansa ta bibando loke ta trata intimidacion na pia di trabou.

Manera Albertus a sigura, esaki ta un situacion “hopi delicado” pa motibo cu maestronan no ta saliendo asina facil manera antes pa vocifera, e intimidacion cu nan ta confronta no ta bon segun Albertus a bisa, nan ta wordo yama na oficina nan so pa por wordo intimida, otro caso ademas di esey ta cu algun di nan a wordo hala di scol y tambe a wordo kita for di nan puesto.

Pa via di esaki, Albertus a declara cu nan ta hopi demotiva na nan trabou y e consecuencia ta cu esaki ta baha e calidad den enseñansa tambe y na final e alumno ta esun cu ta wordo perhudica, pasobra nan ta esun cu tin haya enseñansa di calidad y si e docente no ta motiva, no tin paz laboral y ademas si ta wordo intimida e no ta funciona na manera cu mester.

Albertus a manifesta cu te ainda nan ta tene esey na cuenta, nan ta monitor e situacion y si tin mester nan lo sali na nan defensa, diahuebs ultimo ora cu nan a sinta cu minister Lampe, Albertus a trece dilanti e topico aki den e reunion y bisa cu loke ta pasando no por sigui tuma luga, segun el a declara, minister Lampe a menciona cu esey no ta berdad pero e docentenan si sa cu ta pasando y nan ta vociferando.

“Minister sa bon bon kico e ta haciendo, e ta kibrando scolnan haciendo nan mas chikito pasobra e mester hinca nan hunto”, el a finalisa.