Ayera mainta, prome minister Evelyn Wever-Croes a papia tocante Landspakket na unda el a splica cu dia 13 di november di aña pasa nan a yega na un acuerdo cu Hulanda pa por yega na financiamento di e necesidadnan financiero di pais Aruba.

Pa cu esaki, el a menciona cu Covid-19 su efectonan lo dura hopi y el a afecta finansa por completo, Hulanda a trece un acuerdo pa por yega na un fiansa na 0% pero nan a pone cierto condicionnan, esun cu ta den e landspakket.

Tambe, e luna pasa nan a acorda un agenda na unda nan ta wak con nan ta bay atende cu e diferente puntonan di e landspakket y cada dos siman tin algun accion cu ta yegando na e dead line y mester cumpli cu nan.

E condicionnan cu ta wordo stipula na e landspakket “ta algo cu nos ta tuma hopi na serio pasobra nos no ta core e riesgo di no haya financiamento of prestamo di Hulanda” prome minister a sigura cu nan tin un bon relacion cu Hulanda riba esaki, tin un dialogo constante y habri, di e prome kwartaal nan a traha e agenda caba y pronto nan lo traha riba e di dos kwartaal pa di un forma constructivo por sigui traha riba cambionan cu mester tuma luga.

Pa 1 di maart tabatin varios tema cu ta riba e landspakket su agenda y un di nan ta e maneho financiero, riba esaki prome minister a señala cu Minister di Finansa y Asuntonan Economico Xiomara Maduro a papia extensamente riba dje, na unda a expresa cu mester a traha un inventarisacion di cual ta e leynan cu mester a wordo ehecuta pa asina por reforsa e columna financiero.

“Pa fortifica e columna financiero Directie Financien, Algemene rekenkamer, Central Accountancy, ta institutonan cu tin cu yuda nos pa nos tin un control financiero hopi mas stabiel”, prome minister a informa.

E otro tema tabata e gasto y eficiencia di sector publico, di esaki el a sigura cu ta un investigacion cu lo mester bay tuma luga y aworaki a papia solamente di e destaho, con e investigacion ta bay tuma luga riba e condicionnan primario, secundario y terciario di trabounan di personanan cu ta traha den servicio di gobierno.

E di tres tema ta papia di impuesto, pa esaki prome minister a agrega cu a wordo presenta un plan di accion con den futuro nan ta bay revisa y haci e reforma fiscal y e programa di cumplimento, con nan ta bay purba stimula mas hopi hende posibel pa cumpli cu e debernan fiscal cu tin.

Tambe tin un negociacion andando riba un tratado entre Hulanda y Aruba riba Base Erosion and Profit Shifting (BEPS den terminologia fiscal) y esey tambe ta andando ainda.

Esey ta temanan cu a wordo trata den e agenda di maart segun prome minister a menciona cu tin di haber cu sector financiero, cu ta e leynan cu tin cu wordo haci den cuadro di leynan cu mester ta inplace contra financiamento di terorismo y contra labamento di placa.

Di tema economico, tabatin un punto riba agenda cu prome minister a bisa cu ta e tema di ayudo humanitario den forma di cuminda, manera ta conoci Hulanda via Cruz Cora ta esun cu tin e mayoria di e responsabilidad den esaki.

Aña pasa nan a manda un ayudo ekivalente pa 27 miyon florin, Aruba di su banda a traves di donacion cu a wordo haci, recaudacion di fondo y un contribucion di Gobierno e aporte total tabata di 3 miyon y gastonan tabata di 30 miyon.

Hulanda a indica cu e aña aki Aruba tin cu tuma over pa motibo cu nan no por sigui carga e ayudo di Cruz Cora na unda nan a palabra cu nan ta bay fia Aruba e placa y akinan nan ta bay haci e logistica.

Den dianan dilanti, prome minister a manifesta cu Hulanda ta repasando e documento cu Aruba a entrega y despues hunto nan lo defini kico ta e siguiente pasonan.