Minister Glenbert Croes a lamenta tardansa den pago di FASE: Cifra di ayudo social ta birando mas grandi

Aunke FASE a wordo prolonga te luna di maart, minister di Labor y Asunto Social, Glenbert Croes, a sigura ayera cu e ayudo aki lo sigui, te ora lo bini otro sistema di ayudo structura y bao cierto condicion cu lo reemplasa FASE.

“Nos ta trahando riba un structura miho y permanente cu FASE,” el a bisa.

Te ainda nan ta trahando riba e formula aki, pero si e lo ta uno pa stimula e hende no solamente pa ta prepara pa haya trabao, sino pa traha tambe, ya sea di forma boluntario. E mandatario a laga sa cu e biaha aki nan a confronta un tardansa pa paga FASE. Pero mas tarda entrante dialuna awor, e ayudo aki lo cuminsa drenta cerca e hendenan cu a aplica pe.

El a argumenta cu un motibo di e tardansa ta debi cu durante e control interno hopi fout nan a descubri riba aplicacion di e ayudo aki. Esaki a haci cu mas di 1 mil solicitud nan peticion no a wordo honra pa algun of otro fout cometi.

Update

El a duna un update riba e ultimo pago di luna di januari 2021. E luna ey 3.778 persona (famia) a haya e yudansa di FASE pa un suma total di 3’587.100 florin. Ademas el a referi riba pago di subsidio di salario na januari ultimo. Un total di 18.786 trahado a ricibi subsidio di salario pa un suma total di 25.6 miyon florin destina pa 1.453 compania.

Ademas 3 mil persona (famia) ta haya e Covid bijstad. E cifranan aki ta resalta y cuantifica e magnitud di cuanto famia ta depende di e yudansa social aki pa logra sobrevivi, ya cu nan por resulta suma hopi tiki compara cu e necesidadnan particular cu cada famia tin.

Encuanto e suma cu a wordo presupuesta den presupuesto 2021 pa garantisa e ayudo aki, e mandatario a bisa cu nan ta trahando riba dje. Pero e lo ta un presupuesto casi similar na loke a wordo destina na e fondo di FASE durante 2020. Na 2020 e no tabata un suma presupuesta, ya cu e tempo aya gobierno no por a imagina cu e pandemia a bay asota nos pais di e manera actual.

Pa medio di entrega di beneficio salarial di empleadonan di sector publico y di empresanan estatal a wordo crea e fondo pa FASE. El a delanta cu loke nan a maneha como fondo aña pasa pa FASE nos ta continua cu nan pa 2021. Esey ta poni den nan planificacion financiero. E mandatario a keda pendiente di bin cu e suma exacto cu a wordo presupuesta.

E no a bin cu e cifra, ya cu nan ta trahando riba un structura pa bin cu un sistema permanente di ayudo pa trahadonan desemplea. Nan meta ta pa introduci e proyecto aki pa 2021, pero e fecha exacto e no tin e ainda. Pero den todo caso FASE ta temporal, pero e lo keda vigente te ora cu gobierno lo bin cu un miho alternativa.

Caso den corte y FASE

Desde existencia di FASE cu pronto lo cumpli un aña, un total di 46’556.442 florin (april 2020/januari 2021) a wordo paga pa yuda un total di 48.506 persona.

Pero e mandatario a bisa cu no mester mira e cifra aki como e suma total destina den presupuesto di pais Aruba pa 2020. El a splica cu e ciclo presupuestario normalmente ta di 12 luna, pero mester compronde cu ya caba nos ta den e di tres luna di 2021.

Ainda ta pendiente pa dia 10 di maart e veredicto di corte cay riba e caso cu sindicato SIWA a entabla contra WEB N.V. pa evita cu di un forma unilateral gerencia di e compania estatal sigui corta for di nan salario, y cual lo ta e impacto riba FASE su fondo di solidaridad. Minister Croes a gradici y tambe a haci un yamado pa empleadonan di sector publico y semi publico sigui mustra nan solidarismo cu esunnan cu a keda desemplea pa causa di Covid-19.

E ta haya cu si un veredicto ta tumba e obhetivo di FASE cu ta un fondo di asistencia social di emergencia pa yuda un ciudadano cu a perde tur cos den momento di emergencia, mester pensa riba alternativa. Pues independiente di e veredicto aki loke no ta un opcion pa gobierno di Aruba -segun minister Croes- pa e ayudo aki cay afo pa su impacto den comunidad. Nos ta pasando den momento hopi dificil desde cu Covid a dal nos, pero e mandatario ta premira cu ainda Aruba lo sigui pasa den momentonan dificil. Mas trahado lo bay perde trabao y companianan cu lo sigui cera.

Igualmente el a resalta cu 10 di maart ta delaster dia pa esunnan cu kier solicita pa e ayudo di FASE pa e luna aki. Na luna di februari tabatin hopi hende cu pa un motibo of otro no a aplica na tempo. Esun cu aplica despues di e prome 10 dia di luna, no tabata posibel pa procesa nan solicitud sin excepcion, el a bisa. Ainda tur hende of comerciante independiente cu tin mester di ayudo di FASE ta na tempo pa e luna aki -sea pa aplicacion nobo of prolongacion- pero nan mester haci’e prome cu dia 10 di maart.

El a bisa cu nan a bin cu FASE pa yuda y no pa gobierno keda cu e fondo social aki. Pero despues cu e team di FASE Task Forse ta diligencia cada solicitud pa ayudo di FASE ta bin un control interno realisa pa SVb (Banco di Seguro Social), caminda nan ta controla e lista di FASE, ora cu e subsidio di salario ta wordo paga. E ta un forma pa evita por ehempel e dobel pago, kiermen si bo ta haya subsidio di salario, logicamente bo no mester haya ayudo di FASE.