Kico ta haci pa esnan… Cu no por paga auto…?

Nos tin e impresion cu tin e tendencia di lubida kico ta e preguntanan general di desaroyo, cu na e momento aki, den e crisis actual, ta keda den background, mientras cu nan merece di ta den centro di nos atencion. Esaki pasobra hustamente den e situacion di crisis e asuntonan aki ta bira mas grave, y esnan cu ta sufri mas tanto di esaki ta persona di menos recurso.

Por ehemplo, nos ta biba den un pais ‘supermotorisa’ unda un mayoria grandi ta dispone di un auto pa nan transporte personal. Un minoria, esnan cu tin asina poco recurso cu nan no por afford un auto, ta obliga di depende riba transporte publico, o loke en todo caso ta pasa pa esey. Un grupo bastante grandi a logra probecha di e posibilidad pa importa auto segunda mano barata, mas tanto RHD, loke di biaha ta pone nan den un categoria special, pero den e editorial aki esey no ta relevante. Nos ta papia di e posibilidad pa trece un auto asina di exterior solamente for di e punto di vista cu e ta un alternativa relativamente economico, na alcance di esnan cu di otro manera no por afford un auto. E popularidad di e alternativa aki ta papia pa su mes; nos no ta bay papia tampoco di e posibilidad o e deseo pa gbierno prohibi entrada di e vehiculonan aki. Simplemente nos ta mustra riba e fenomeno cu ta surgi unda ciudadano ta busca alternativa pagable cu e mes por maneha.

Awor, inmediatamente mester surgi e pregunta pakico ta asina importante pa por conta cu bo propio transporte? Esey pa ningun di nos lo ta un contesta dificil: pasobra sin esey, bo no ta yega ningun caminda! Ok, esey nos tur sa, anto nos por laga e asunto te eynan anto… Nos no ta kere esey, psobra ta pesey nos ta den un crisis. Den e situacion actual e golpinan no ta cay den e clase medio bay ariba, aunke nan tambe tin menos placa pa destina na cas y transporte, pero nan tin ainda. Manera den tur sociedad, e golpinan mas fuerte ta cay den e segmento mas vulnerable, cerca esnan cu no tabatin transporte propio y esnan cu apenas tabatin transporte propio. Si den e actual crisis nan a keda sin trabao, cos ta bira dificil. Y kico ta e respuesta den e caso aki? Nan por haya ayudo alimentario y un poco mas. Esey ta berdad pero nos ta kere si cu awor ta e momento pa bolbe tira un vista critico riba nos transporte publico. Kico ta e situacion?

Nos tin un sistema di transporte publico cu obviamente no ta responde na e necesidadnan den comunidad di transporte bon y pagable. Loke nos tin ta un compania estatal cu ta lidiando cu e multiple problemanan cu nos situacion ta impone riba nan, loke ta resulta den algo no satisfactorio pa loke ta e papel cu transporte publico tin di hunga den nos sociedad y economia. Esey ta haci cu pa hopi aña caba e ciudadano, segun tamaño di su cartera, ta busca un solucion pa su mes, y ey e famoso auto importa segunda mano ta bin aden. Pero tambe e situacion di e empresa riba su mes no ta di gaba. Nos por observa cu un di e fuentenan di entrada pa e compania lo tabata su filial cu yama Aruparking, cu a cay den un tumba di cual nos no ta mir’e sali por lo pronto. Desde inicio di e gabinete aki lo a bin cu un solucion definitivo pa e asunto di parkeer den Playa, pero ni sikiera nos por sa si el a keda na bon intencion, pasobra nos no a mira ni tende nada. Parce cu tur atencion mester a bay na un manyen di persona cu mester bay pisca cu harpun, y algun compania cu mester gana placa cu ofrece spearfishing como pasa tiempo cuestionable na turista. Ademas, si nos tira un vista riba e lista cu CAft a publica di e estado di cumplimento di entidadnan estatal cu nan propio reglanan di bon administracion financiero, y cu ta aparece den e edicion aki, nos ta topa Arubus NV entre esnan cu ta canando atras varios aña, di cual no tin cuenta anual disponible. E mesun situacion cu nos a observa na Serlimar cu a causa tanto problema, y cu te ainda no a keda resolvi. Esaki ta indica cu, banda di e problemanan general cu e servicio di bus ta encontra, cu ta algo comun na hopi pais na mundo, den e caso aki nos ta papiando di mal maneho ademas, pa cual no por tin excusa. Si ta bisa cu e empresa ta bay malo, pero no por presenta buki debidamente, anto ta imposible pa hustifica e situacion aki. Awor, nos sa cu lo tin esnan cu ta bisa: “Pero no ta nan so, bo no ta mira cu un mayoria di entidad estatal ta den incumplimento…?” Esey ta berdad, pero si den un Aruba cu den e proximo añanan lo conoce un pobreza hopi mas fuerte, nos mester por conta cu e instrumentonan pa combati esaki. Transporte publico bon y pagable ta algo strategico pa cualkier gobierno, y nos no ta scucha sikiera discusion di esaki.