E persona cu ta cuida e cachonan di Lady Gaga, cu a converti den victima di tiramento durante un robo na Hollywood durante cual a horta dos di e French bulldog di e cantante, a describi e violencia y su recuperacion ‘di ta hopi cerca di morto’ riba rednan social dialuna.
Postnan di Ryan Fischer ta inclui potret saca den hospital, unda e ta bisa ‘hopi sanamento ainda mester tuma luga’ pero e ta anticipa su reunion cu e cachonan.
A tira Fischer un biaha mientras e tabata cana cu tres cacho di Lady Gaga diaranson anochi riba un caya cerca di e famoso Sunset Boulevard. Video a capta e incidente den cual Fischer ta grita ‘Mi Dios! Mi a wordo tira!’ y ‘yuda mi!’
Polis ta buscando dos homber den e atake y a bisa dialuna cu ainda nan ta investigando.
A debolbe e dos cacho, yama Koji y Gustav, ileso diabierna nochi na momento cu un muhe a presenta na stacion di polis di Los Angeles cu nan. Detectivenan no ta kere cu e tabata involucra den e robo of tiramento y no tabata sa si e lo ricibi e recompensa di mey miyon dollar cu Lady Gaga a ofrece pa retorno di e cachonan. E cantante actualmente ta na Roma filmando un pelicula.
Fischer a gradici Lady Gaga pa su sosten durante e dificultad, skirbiendo ‘bo babynan ta back y e famia ta completo… nos a logra!’ den post riba Instagram. Un di tres cacho, yama Asia, a huy di e ladronnan y a drumi banda di Fischer ‘mientras un auto a aleha rapidamente y sanger a sali di mi herida’, el a skirbi.
E video, graba di doorbell di un cas, ta mustra un sedan blanco acercando y dos homber ta bula afo. Nan ta lucha cu Fischer prome cu un di nan a saca un arma y a tira un solo bala prome cu a huy cu dos di e cacho.
