CAft cu bista critico riba concepto di presupuesto; no a baha gasto personal segun un maneho structural; Presupuesto di Aruba pa 2021 tin un deficit di casi 24 porciento di GDP

En bes di un (1) porciento di Producto Bruto Nacional, GDP, na surplus, tin un deficit presupuestario di 23,6 di GDP. Esey ta e comentario cu College Aruba Financieel Toezicht, CAft a bisa Minister di Finanzas Xiomara Maduro riba presupuesto di 2021. E deficit di 23,6 porciento ta representa un buraco di 1.008 miyon florin pa 2021 y ta inclui e presupuesto di e sector colectivo (AZV, SVB etc). Pues, CAft ta conclui cu no a cumpli cu e protocol cu Hulanda, unda mester yega na surplus y mas ainda, e calculacion ta rondona pa insiguridadnan cu ta mas cu promedio.

CAft a ricibi e concepto di presupuesto 2021 hunto cu su splicacion, esta e Memorie van Toelichting dia 4 di Januari pa asina duna su conseho, conforme e LAft, cu ta e landsverordening Aruba tijdelijk financieel toezicht. Pa por a presenta e concepto di Presupuesto 2021, e mester ta acompaña pa e conseho di CAft segun e LAft. Y e cuadro di evaluacion cu CAft ta uza ta tanto e LAft y e protocol di 22 di November 2018, cu a cera cu Conseho di Minister di Reino.

Dia 9 di November 2020, Aruba a pidi Conseho di Minister di Reino pa por desvia di e protocol pa 2021 y a haya aprobacion dia 18 di December 2020, pero no a indica con leu por desvia. Esaki lo keda determina despues.

Evaluacion

Segun CAft, e deficit financiero den e concepto di Presupuesto di Aruba, sin conta e entidadnan di Gobierno cu ta forma parti di e sector colectivo, ta yega na casi un biyon florin, esta 988 miyon cu ta 23 porciento di GDP di Aruba. Si agrega e sector colectivo, e deficit ta subi te riba un biyon, esta 1.008 miyon, cu ta 23,6 porciento.

Crecemento proyecta no ta sigur

Aruba ta bisa den su concepto di Presupuesto cu ta spera un crecemento di 5,6 porciento di GDP pa 2021. Pero mirando cu ainda tin hopi insiguridad riba e desaroyo na 2021, CAft ta di opinion cu e proyeccion aki no ta punto di salida suficientemente concreto pa e calculacion di presupuesto. A pesar di e deficitnan premira,a baha e tarifa di loonbelasting pa un suma di 15 miyon florin. CAft como tal ta pidi pa hala e paso aki aden of pa bin cu un aumento di belasting na otro caminda, entre otro a base di e palabracionnan den e landspakket cu mester tin un reforma structural di belasting. CAft a conseha pa uza e conseho di IMF di 2018, esta e

‘IMF Technical Assistance Report: Towards a sustainable tax system.’

Na e parti di costo di presupuesto a calcula un suma di 536 miyon florin pa cubri e buraconan den siguridad social (SVB y AZV) y e medidanan di sosten social, manera e loonsubsidie, asistencia di desempleo, e areglo MKB y FASE. Esaki ta 78 miyon florin mas cu na 2020. E argumentacion di e cifranan aki no ta suficiente segun CAft. E colegio ta di opinion cu a base di e cifranan realisa na 2020 y e proyeccion di crecemento economico, mester por ahusta e sumanan bay abou. E proyeccionnan di SVB pa determina e deficit ta sali di un scenario mas conservativo cu locual Gobierno ta uza. Es mas, segun CAft, por absorba e deficitnan di SVB for di su propio reservanan, cu ta nifica cu e deficit por baha di 89 miyon pa 28 miyon florin.

AZV

AZV mester a conoce un reduccion di costo di 60 miyon florin pa 2021, di 58 miyon na 2020. CAft kier un splicacion amplio di e suma aki y e decision. E colegio ta mustra cu for di punto di bista di finanzas sostenibel di Gobierno e ta necesario pa realisa e reduccion di costo aki a largo plaso. Mescos ta conseha pa baha e gastonan pa servicio y producto mas ainda na 2021.

Gasto di Personal

Pa loke ta personal di Gobierno, segun CAft Aruba ta cumpli cu e norma di e protocol di 2018 cu ta bisa cu e peso di gasto di personal mester baha nominalmente tur aña. Y compara cu presupuesto 2020, e gastonan di personal ta proyecta di baha cu 11 miyon na 2021. Pero, e reduccion ta basa riba continuacion di e cortamento di salario y beneficionan di ambtenaar y mandatario y parlamentarionan, y un rebaho den e cantidad di overtime. Pues, e reduccion no ta basa unicamente riba e plan di maneho reduccion gasto personal, conoci como BVP, esta Beleidsplan Verlaging Personeelslasten. Mas ainda, a crea un fondo di ocho (8) miyon florin adicional pa vacatura, cu ta contradictorio na e BVP. CAft a indica caba cu den e ehecucion di e BVP no tur medida a conduci na reduccion di gasto concreto. Es mas, segun CAft, no ta ehecuta e BVP suficientemente, falta un direccion y ta pidi Gobierno pa tuma esaki na serio y no presupuesta pa mas vacatura.

Inversion

Aruba a pone un suma di 20 miyon florin pa inversion. CAft ta di opinion cu unicamente por haci inversionnan pa mantencion of pa reemplaso y cu ta cuadra cu e landspakket acorda cu Hulanda. E inversionnan cu tin den e concepto di Presupuesto 2021 ta cumpli cu e criteria aki. Pero, a tuma algun gasto regular den e inversionnan aki. Como tal, mester reduci e suma cu ta reserva pa gastonan regular. No a pone ningun inversion den e concepto di Presupuesto 2021 cu ta forma parti di e landspakket.

Ademas, CAft a constata cu no a cera ningun acuerdo Public Private Partnership, PPP, nobo, de acuerdo cu e protocol cu Hulanda.

Conexion landspakket y inversion

Di otro banda, tin diferente parti di e proyecto di ley unda no ta cla cua actividad concreto ta referi na dje y cua ta e fondonan presupuesta destina pa ehecucion di e landspakket. Un ehempel ta e mehoracion di maneho financiero, algo cu pa hopi tempo caba CAft ta urgi p’e. Como tal, kier mira plannan concreto di e landspakket den presupuesto y trece un conexion entre e gastonan presupuesta y inversion.

Finalmente, CAft ta constata cu e forma con pa hinca e proyecto di Presupuesto den otro a mehora compara cu den pasado. Pero e proyecto di ley ta gana mas na balor informativo si no solamente ta declara e mutacionnan basa riba maneho, pero duna un splicacion amplio riba e tipo di medio y sorto di costo den e splicacion di maneho.

Reduccion 12,6 porciento riba salario entidad publico

CAft a bisa tambe pa inclui un calculacion pa entradanan for di e reduccion di e 12,6 porciento riba condicionnan di trabou pa entidadnan publico, y cu mester haci palabracion concreto cu Serlimar riba mehoracion den maneho y ahustacion di e ley di desperdicio, di forma cu por baha e resultado presupuesta di un buraco di 7 miyon na cero. CAft ta urgi pa yega na palabracionnan cu Banco Central di Aruba riba e pago di dividendo pa 2020 y tuma esaki pa presupuesto 2021. Pero ta crucial pa Aruba elimina retrasonan den e proceso di traha presupuesto y presenta esaki mas pronto posibel na Parlamento. CAft a urgi prome di Februari ultimo, pero te ainda e proposicion di ley di Presupuesto pa 2021 no a yega Parlamento.