Cu un industria petrolero devasta sancion fuerte di Merca cu ta haci dificil pa comercializa crudo, Venezuela lo perde e aumento fuerte di prijs di petroleo, cu a yega na e nivel mas halto den un aña, despues di e impacto di e pandemia, segun analistanan di mercado.
E prijs di ‘basket’ di OPEC a yega na un promedio di 54,38 dollar pa bari na januari, mientrase crudo di referencia di Venezuela, Merey 16, a keda na 37,40 dollar. A pesar di su caida, petroleo ta keda e producto principal di exportacion y principal fuente di divisa di Venezuela.
E capacidad di e industria Venezolano pa probecha e aumento di prijs causa pa e ola di friu na Merca cu a paraliza e regionnan mas importante di petroleo, ta keda den duda, segun asesor petrolero Carlos Mendoza Potellá.
E produccion di e empresa estatal Pdvsa a baha te na nivel di decada di 1930 y 1940. E oferta a cuminza 2021 cu un recuperacion leve, segun cifranan di OPEC, pero apenas a yega na 487.000 bari pa dia na januari, hopi leu di e mas di 3 miyon bari pa dia cu e pais tabata produci tempo cu Maduro a yega na poder na 2013.
Maduro a haci e promesa di hiba produccion na 1,5 miyon pa dia e aña aki, pero e specialistanan di e industria ta esceptico, den un economia cu ta den su di siete aña consecutivo di recesion.
Ta imposible mehoraproduccion den e circunstancianan critico den cual e industria petrolero Venezolano ta, incluso si mañan nan kita e sancionnan (…). Nos no ta abao na suelo, nos ta den un foso,” Mendoza a bisa AFP.
Añanan di falta di inversion, mal maneho y corupcion a hundi e industria aki, segun e expertonan. Y e sancionnan di Washington pa trata di forzasalida di poder di Maduro tabata e golpi di gracia cu e prohibicion di negocia crudo Venezolano, desde april 2019.
“Nos a yega cu e sancionnan aki na un situacion extremo,” Maduro ta bisa. “Nos tabata 14 luna sin bende un gota di petroleo.” AFP a trata di contacta, sin respuesta, voceronan di Pdvsa y Ministerio di Petroleo.
