Diasabra ultimo tabata e di cinco dia continuo den cual Brasil a conta mas di 1.300 morto diario pa Covid-19, e total di fayecido ta yega casi na 255.000, na momento cu e pandemia tin e pais semi-paralisa debi na intensidad di e segundo ola mas contagioso, Gobierno a informa.
Brasil, un di e paisnan mas asota pa e virus, a registra 1.386 morto den ultimo 24 ora y a suma un total ta 254.221 morto, segun un boletin publica ayera pa Ministerio di Salud.
Den ultimo cinco dianan e numbernan di fayecido a permanece riba 1.300: 1.386 diamars, 1.428 diaranson, 1.541 diahuebs, 1.337 diabierna y 1.386 diasabra.
E number di contagio tambe ta halto y a wordo registra 61.302 nobo contagio cu un total di personanan infecta na e pais cu ta yega na 10.517.232.
Desde haci mas di un luna, e promedio di morto pa Covid-19 na e pais ta surpasa e cifra di 1.000 pa dia y esun di contagio ta yega cerca di 50.000, cifranan cu tin na estado critico e pais, pa via cu sistema di salud di 13 di e 27 estado ta menasa cu un collapse y Unidadnan di Cuido Intensivo (ICU) casi ta surpasa su capacidad.
Den e regionnan mas afecta a pone medidanan di restriccion mas fuerte, hunto cu toque de queda nocturno y ciere di negoshinan.
Cu e aumento di fayecidonan y casonan diasabra ultimo, e cifra di mortalidad di enfermedad na e pais a yega na 121 fayecido pa cada 100.000 habitante. E cifra di letalidad di enfermedad na Brasil a mantene na 2,4% di e total di e poblacion.
