E ciudadano, Rocky Kelly, ainda ta deteni despues cu el a cende varios taira na candela dilanti sede di e representacion Hulandes, esta VNO, durante fin di siman ultimo. Diamars ultimo Fiscal a papia cun’e y e biaha aki ta mustra cu e situacion lo bira mas complica pa Rocky sali den libertad.
Esaki ta e di tres biaha cu Kelly ta wordo deteni pa cendemento di candela dilanti di Parlamento y Oficina di Gobernacion. Den pasado el a keda deteni, pero cada biaha pa solamente dies dia. Esaki ta encera cu den pasado Ministerio Publico (OM) no a pidi prolongacion pe, caminda su detencion lo a wordo prolonga y e lo a wordo pasa pa KIA. E biaha aki si pa casualidad, e “hoofdofficier” di e tempo ey mes tabatin warda ora cu Rocky a wordo deteni dilanti di VNO.
Investigacion ta sigui riba e sospechoso aki, caminda fiscal na un dado momento ta bay dicidi si ta pidi prolongacion of no. E echo cu ta suspende un persona su detencion no ta nifica cu e ta liber di tur acusacion, kiermen simplemente cu e por warda e investigacion. E decision di fiscal y eventualmente e caso den corte ta determina e persona su libertad, esey ta conta tambe pa Kelly, segun informacion cu Bon Dia Aruba a obtene di OM.
