Ayera mainta durante un conferencia di prensa semi-virtual, minister Plenipotenciario, Guillfred Besaril for di Hulanda, y director di CEDE Aruba, Daniel Tecklenborg for di Aruba, a anuncia e celebracion di Aruba Dag Festival 2021.

E celebracion aki lo tuma luga dia 28 di maart venidero pa 12or di merdia ora local y for di 6or atardi ora di Hulanda. Minister Besaril a laga sa cu den cuadro di 35 aña di Status Aparte nan a dicidi di bin hunto pa realisa e celebracion aki, mescos cu nan a haci dia 25 di januari riba Dia di Betico.

E custumbrando Aruba Dag ta un evento cultural y musical, caminda lo tin participacion di celebridad-, agrupacion- y artistanan di Aruba, Hulanda, Corsou, Bonaire y St. Maarten. E ta haya cu esaki ta un muestra di e partnernan di Reino cu ta duna un ehempel grandi “cu bo tin bo curason den e luga corecto,” segun Besaril.

E biaha aki e lo wordo celebra di un forma virtual, ya cu ainda mundo henter ta meymey di un pandemia. E biaha aki e ta bira un iniciativa humanitario pa yuda esun cu e pandemia a causa hopi dolor na Aruba.

P’esey Aruba Huis hunto cu CEDE Aruba a dicidi di uni esfuerso pa e celebracion aki por bira un escenario ideal pa yuda recauda fondo pa e ‘iniciativa bunita’ di Happy To Give Back, asina Minister Plenipotenciario a bisa. Kiermen unda cu bo por ta, ya sea na Aruba, Hulanda of for di otro paisnan di Europa, of for di cualkier parti di mundo, nan por haci uzo di e plataforma aki den cual “tur Arubiano cu ta afo ta duna back.”

CEDE Aruba

Tecklenborg a bisa cu Aruba Dag Festival 2021 lo ta un escenario ideal pa sigui recauda fondo pa e proyecto Happy To Give Back. Un proyecto cu CEDE Aruba a bin cune pa yuda e famianan mas vulnerabel afecta pa causa di e pandemia. Esaki ta e delaster actividad pa recauda fondo pa Happy To Give Back. Nan ta premira cu e situacion di mas famia den necesidad lo bira mas grandi, y e tipo di ayudo aki mester bin di un forma mas structura.

Segun Tecklenborg, CEDE Aruba ta hopi consciente di e situacion actual. P’esey el a expresa cu pa nan Aruba Dag ta e momento cu nos ta bay cera Happy To Give Back definitivamente. P’esey e actividad di Aruba Dag ta bira un oportunidad mas pa tur hende cu por duna un man.

Nan lo sigui traha den cualkier otro plan cu lo wordo diseña actualmente hunto cu gobierno di Aruba. Si CEDE Aruba lo bini cu otro iniciativa pa yuda nos pueblo, nan lo anunci’e oportunamente. “Nos ta consciente cu e problema ta subi y bo no por keda pidi tanto di comunidad,” Tecklenborg a bisa.

Durante e ultimo lunanan Happy To Give Back a recauda un suma di 1’034.625 florin. “E ta zona un suma masha grandi mes, pero den e situacion cu nos ta na Aruba, e ta eigenlijk un suma hopi chikito,” el a declara. Pero CEDE Aruba ta contento cu e sosten y apoyo di nos comunidad.

E suma aki recauda a base di e contribucion generoso di hopi hende a wordo reparti pa tres fundacion: Fundacion Pa Nos Comunidad cu a ricibi 75% di e suma aki. Fundacion Ban Uni Man pa Cria Nos Muchanan a ricibi un 15%. Y YMCA a ricibi un 10%. Tecklenborg a bisa cu door di esaki tur hende cu a contribui cu CEDE Aruba a logra yuda famianan cu 2.316 pakete di cuminda. Ademas cu mas di 53 mil desayuno a wordo duna pa muchanan y mas cu 25 mil cuminda cayente traha den YMCA a wordo reparti pa Cruz Cora.

Contribucion

Director di CEDE Aruba ta haya cu Aruba Dag ta un evento importante pa celebra e amor pa nos isla, positivismo y solidaridad.

Segun Tecklenborg, Aruba ta den un situacion hopi vulnerabel ainda. A pesar cu a wordo prepara escenario pa un economia mas fuerte y naturalmente tur hende kier keda positivo. “Pero nos mester ta realistico tambe cu e aña aki ta bay ta un aña duro ainda, unda mas hende lo bay perde nan trabao,” el a bisa.

El a gradici e confiansa brinda na CEDE Aruba cu ta un organisacion sin animo di lucro cu ta sostene iniciativa local y comunitario. Desde comienso di e pandemia CEDE Aruba a mantene un rol activo den recauda fondo y maneha fondo pa brinda asistencia di alimentacion na hendenan local, pero tambe migrantenan indocumenta den nos comunidad.

CEDE Aruba ta traha hunto cu diferente iniciativa, entre nan Happy To Give Back cu nan mes a inicia. El a bisa cu Aruba Dag Festival 2021 ta e manera pa tur hende na Aruba, y tur Arubiano rond mundo por duna nan contribucion. Pero tambe tur e amigonan di Aruba, entre nan turistanan cu ta stima nos isla, pa asina nan contribui cu e causa di asistencia di alimentacion.

E ta haya cu ta importante durante e bunita celebracion virtual di Aruba Dag Festival 2021 cu minister Guillfred Besaril a anuncia ayera for di De Haag, pa nos celebra nos amor pa Aruba. Pero fundamentalmente nos mester corda cu for di unda cu nos por ta, nos mester yuda otro.

Director di CEDE Aruba a anuncia cu Happy To Give Back lo pone su infrastructura disponibel pa tur hende por haci donacion for di unda cu nan ta. Nan grupo meta ta tur Arubiano y tur amigonan di Aruba cu ta biba afo, caminda nan por haci nan donacion online. Esaki por wordo haci durante of prome di e evento di dia 28 di maart venidero. Esun interesa por consulta e website: www.happytogiveback.com unda tin diferente alternativa pa bo por haci bo donacion.

El a trece dilanti cu e fondo aki ta wordo colecta pa CEDE Aruba, pero e ta bay directamente pa e iniciativa di e fundacionnan cu ta duna asistencia di alimentacion. “Ningun florin ta keda ariba nos cuenta di banco. Na final tur cos ta bay back den pueblo. Nos ta garantisa esaki,” asina Daniel Tecklenborg a bisa.

Un yamado ta wordo haci tanto di parti di minister Plenipotenciario, Guillfred Besaril, como di director di CEDE Aruba, Daniel Tecklenborg, pa tur Arubiano estableci na Aruba y pafo di nos isla; y tambe amigonan internacional di Aruba pa den cuadro di Aruba Dag Festival 2021 y nan celebracion virtual di e fecha nacional aki, nan lo por contribucion cu un suma chikito of grandi, manera cada un di nos por na Happy To Give Back pa asina yuda mas hende posibel den necesidad.