For di algun dia atras, Sindicato di Maestro di Aruba (SIMAR) ta bin informando comunidad riba nan rednan social tocante varios caso di intimidacion di maestronan cu ta tumando luga na nan pia di trabao, un situacion cu nan mes a categorisa como preocupante y delicado.

Bon Dia Aruba a tuma contacto cu Josephine Albertus, presidente di e sindicato aki, y el señala cu esaki a cuminsa for di basta tempo caba. Nan como directiva a drenta na 2018 y for di momento cu nan a drenta, nan ta bezig cu retonan. Y awor ora pandemia di Covid-19 a yega, esey a trece mas reto cune, haciendo e situacion mas fastioso pa docentenan.

“Esaki cada biaha ta aumentando y e ta birando pio”, Albertus a señala. Igualmente a indica cu actualmente nan ta ricibiendo un cantidad halto di melding di intimidacion cu ta pasando na scol.

Ademas, el a afirma cu esaki ta un situacion “hopi delicado” pa motibo cu maestronan no ta saliendo asina facil manera antes pa vocifera. E intimidacion cu nan ta confronta no ta bon segun Albertus a bisa, nan ta wordo yama na oficina nan so pa por wordo intimida. Otro caso ta cu algun di nan a wordo hala di scol y tambe a wordo kita for di nan puesto.

Segun Albertus, e situacion ta asina delicado cu e no a menciona nomber, pero nan ta haya hopi preocupante. Nan ta mira e hecho cu tin cu trece na claridad loke ta pasando, pa motibo cu “e no por ta asina” y nan ta haya hopi tristo tambe “pa wak con nos coleganan no tin paz laboral mas y nan no ta funcionando optimal”, el a sigura.

Pa e motibo aki, Albertus a declara cu nan ta hopi demotiva na nan trabao y e consecuencia ta cu esaki ta baha e calidad den enseñansa tambe. Y na final e alumno ta esun cu ta wordo perhudica, pasobra nan ta esun cu tin haya enseñansa di calidad y si e docente no ta motiva, no tin paz laboral y ademas si ta wordo intimida, e no ta funciona na manera cu mester.

Di loke ta e parti financiero, Albertus a trece dilanti cu e minister di Enseñansa, Armando ‘Rudy’ Lampe ta keda corta den enseñansa. “Si nos wak na henter mundo e muchanan a haya un retraso pa via di pandemia Covid-19. Na otro paisnan ta bin cu plannan, nan ta aloca fondonan pa asina por ehecuta e plan. Y na Aruba minister kier tuma e plannan over, pero e no ta aloca fondonan p’e”, el a destaca.

Albertus a comenta cu e ta scucha for di minister Lampe cu e semper ta bay dialoga, e ta bay envolvi e maestronan. “pero te ainda ta cada biaha ta keda informa y asina ey e ta dimas preocupante”.

Ta importante pa trece dilanti e articulo number 3 di statuut di SIMAR cu ta bisa: De Bond streeft naar een vorm van onderwijs en opvoeding, die overeenkomt met de Verklaring uit artikel 2 en onafhankelijk van welke politieke partij dan ook stelt hij zich ten doel:

• de behartiging van de materiële en ideële belangen van de leden en de nagelaten betrekkingen

• de behartiging van de belangen van het onderwijs en de opvoeding in het algemeen

• de culturele en sociale verheffing van het Arubaanse volk.

Di esaki, Albertus a comenta cu nan como sindicato a participa den diferente cumbre, na unda nan a duna informacion na otro partidonan politico “y asina ey nan kier pinta nos como si fuera cu nos ta afilia na un partido politico y esey no ta berdad”.

Enseñansa en general ta haya hopi importante pa trece informacion afo y di e manera ey e mucha por bay dilanti. Nan tin cu innova, sigui desaroya y e unico manera pa haci esey ta pa sigui dialoga cu e diferente stakeholdernan riba e parti di enseñansa.

El a bisa cu nan ta haya lamentabel e parti na unda nan a haya un melding na unda un docente ta wordo bisa cu mandatarionan a bisa nan cu SIMAR ta afilia na un partido politico. “Nos como SIMAR semper ta dispuesto pa dialoga cu cua stakeholder cu ta riba e parti di enseñansa.” Pa motibo cu nan ta haya “enseñansa como un pilar principal di un pais y nos mester sigui dialoga, sigui intercambia informacion pa nos por sigui bay dilanti”, Albertus a sigura.

Pa awor, nan lo sigui keda ofreciendo informacion riba nan rednan social manera nan pagina di Facebookage, pa motibo cu nan ta haya esey importante. Si yega e momento cu nan mester tuma pasonan legal nan lo haci esey, pero e parti mas importante cu el a menciona caba ta pa nan sigui informa e pueblo en general kico ta pasando.

Pa e motibo aki el a referi cu “nos tur ta forma parti di educacion pa nos por bay dilanti” y asina por trece claridad.

El a expresa cu pa por surpasa e crisis cu Covid-19 a trece e solucion pa tur traha hunto, tur pais mester traha riba dje y “si bo no tin paz laboral y e situacion unda cu bo ta trahando no ta saludabel e ora ey nos ta bisa cu nos tin un problema”. Otro paisnan ta purba di soluciona e retonan y nan ta haya hopi lamentabel pa wak unda cu isla Aruba ta wordo scogi pa haci na un manera cu no ta responsabel.

Pa finalisa, el a manifesta cu “nos lo keda critico como sindicato, nos lo keda vocifera, pasobra nos ta haya importante pa sigui educa y duna informacion pa nos tur por sigui bay dilanti”.

Ta importante pa destaca cu Albertus no a menciona cuanto casonan specifico tin di intimidacion pero loke si el a afirma ta cu tin basta caso di diferente scol, diferente docente y den diferente nivel como di maestro, management, director di scol y ta p’esey cu nan ta treciendo e situacion aki dilanti.