Minister di Defensa di regimen di Nicolas Maduro, Vladimir Padrino Lopez, a denuncia ayera cu inteligencia Colombiano a tuma contacto cu capitan militar Venezolano, Ronald Marrero Lozano, pa intenta obtene informacion di Aviacion Militar di e pais Caribeño y ‘agredi’ su soberania.
“Den FANB no tin espacio pa traicion! Danki na e pronto y diligente denuncia di soldadnan patriota, a detene e capitan den reserva activo Ronald Marrero Lozano (…) purbando di obtene informacion di e plataforma strategico SUKHOI-30 MK2 di AMB – Aviacion Militar Bolivariana”, el a bisa riba Twitter.
Den otro mensahe el a agrega cu Lozano a ricibi contacto di ‘alias Andres’, ken supuestamente ta pertenece na e Direccion Nacional di Inteligencia di Colombia y ken no a identifica cu nomber y fam. Segun e, ‘alias Andres’ a ofrece Lozano mil dollar semanal pa duna informacion di AMB.
A indica cu nan tabata comunica ‘a traves di e abonado +573219500962’ y den e sentido aki, a acusa gobierno di Colombia, ‘apoya pa CIA’, di persisti ‘den su actitud hostil contra Venezuela, agrediendo di manera sistematico’ su soberania.
Igualmente el a adverti cu ‘cualkier intento di violacion’ na integridad teritorial di Venezuela, ‘sea convencional of encubierto, lo tin un reaccion contundente’.
E regimen di Nicolas Maduro, sosteni publicamente pa e alto mando militar Venezolano, ta denuncia constantemente cu administracion di presidente Colombiano, Ivan Duque, ta prepara plan pa intenta derroca su gobierno.
Relacion entre ambos pais ta tenso, specialmente despues cu gobierno di Duque a mustra sosten na lider opositor Juan Guaido, ken ta reconoce como presidente interino di Venezuela.
Potret: Infobae.
