Despues cu siman pasa por a tuma nota di e prome vacunacionnan contra Covid-19 cu a inicia na Aruba, awe ta cuminsa e turno pa personanan mayor di 60 aña di edad.
Diahuebs ultimo tabatin e simbolico prome vacunacion di personahenan conoci den comunidad, como tambe Dr. Cayama kende a bira oficialmente e prome persona vacuna contra Covid-19 na Aruba.
Cuminsando awe ta habri dos centro di vacunacion pa cuminsa vacuna e grupo di 60+. Esakinan ta Centro Betico Croes na Santa Cruz y Theresita Center na San Nicolas, cu lo fungi como prome centronan di vacunacion. Ta recorda comunidad cu mester registra online pa vacunacion, door di download e Aruba Health App via e link http://www.dvg.aw/app.
Despues di esaki, cuminsando dia 1 di maart lo habri e proximo cuatro centro di vacunacion, cu ta Club Don Bosco na Noord; JFK Education Centr na Oranjestad; Centro Libertador Betico Croes na Santa Cruz; y Santa Theresita Center na San Nicolas.
Minister di Salubridad Dangui Oduber, durante e prome vacunacionnan diabierna, a curasha comunidad pa registra pa ricibi e vacuna via e app of cerca un di e MFA. Alrededor di 11mil persona a registra caba pa tuma nan vacuna diahuebs ultimo, y ta spera cu e cantidad aki lo aumenta prome cu e vacunacion di poblacion general cuminsa.
