Den un reunion extra ordinario via Zoom, partido POR a bay den forma unanime di acuerdo cu traspaso di e liderazgo di POR pa Parlamentario y Vice-Presidente di Parlamento, Sr. Alan Howell.
Andin Bikker, cu ja desde aña 1997 a cuminsa participa na eleccion y desde 2004 a bin ta haci esaki for di posicion di liderazgo, a dicidi cu despues di 5 eleccion, 8 aña como Parlamentario y entretanto un periodo como minister, a bira tempo pa traspasa liderazgo over pa un generacion mas hoben den politica.
Partido POR den e Gabinete Wever-Croes a duna un aporte solido den ministerraad y for di Parlamento pa yuda goberna y guia nos pais den temponan dificil y sin precedente, entre otro den atende cu y surpasa e retonan di pandemia COVID-19. Sr. Alan Howell sigur tin e cualidadnan y e experiencia pa bay sigui lidera e partido den e proximo eleccion y Andin ta desee hopi exito cu e reto nobo.
Tin hopi apelacion pa Andin sigui den politica y den e tempo nos dilanti, den consulta cu su famia y nucleo di campaña, lo tuma un decision si e lo postula su mes como candidato pa eleccion 2021, of si e lo bay regresa sector priva y reanuda e profesion di abogado. Mientrastanto e lo sigui cu e trabou di Minister den e Gabinete Wever-Croes pa sigui yuda atende cu e retonan grandi cu nos pais ta enfrentando debi na e pandemia di Covid-19 y semper lo por haci un apelacion riba su experiencia como politico, ex-Parlamentario y mandatario.
