Diasabra anochi medionan di comunicacion social a wordo informa di un cambio haci den seno di partido POR, esaki ta trata di su liderazgo.

Den un comunicado di prensa e partido a informa cu den un reunion extraordinario cu a tuma luga via plataforma Zoom, partido POR a bay den forma unanime di acuerdo cu traspaso di e liderazgo di POR pa parlamentario y vice-presidente di Parlamento, Alan Howell.

Asina mes, nan a trece dilanti cu Andin Bikker, cu ya desde aña 1997 a cuminsa participa na eleccion y desde 2004 a bin ta haci esaki for di posicion di liderazgo, a dicidi cu despues di 5 eleccion, 8 aña como parlamentario y entretanto un periodo como minister, a bira tempo pa traspasa e liderazgo over pa un generacion mas hoben den politica.

“Partido POR den e Gabinete Wever-Croes a duna un aporte solido den Conseho di Minister y for di parlamento pa yuda goberna y guia nos pais den temponan dificil y sin precedente”, e comunicado ta señala, agregando, entre otro, atende cu y surpasa e retonan cu pandemia COVID-19 a trece.

Tambe ta menciona cu Alan Howell sigur tin e cualidadnan y e experiencia pa bay sigui lidera e partido den e proximo eleccion y Bikker ta dese’e hopi exito cu e reto nobo.

Segun loke e documento tambe ta expresa, tin hopi apelacion pa Bikker sigui den politica. Den consulta cu su famia y nucleo di campaña, lo tuma un decision si e lo postula su mes como candidato pa eleccion 2021, of si e lo regresa sector priva y reanuda e profesion di abogado. “Mientrastanto e lo sigui cu e trabao di minister den e Gabinete Wever-Croes pa sigui yuda atende cu e retonan grandi cu pais ta enfrentando debi na e pandemia di Covid-19, y semper lo por haci un apelacion riba su experiencia como politico, ex-parlamentario y mandatario”, e comunicado a finalisa.

E anuncio aki a trece dilanti hopi reaccion riba rednan social, mirando cu for di principio e partido aki a cuminsa cu ex-minister Otmar Oduber – cu tempo despues a dicidi di sali for di partido lagando Bikker como lider.

Bon Dia Aruba a tuma contacto cu minister Bikker, pa motibo cu ademas di e polemica cu esaki a causa, tambe a trece cierto rumornan bisando cu e lo bay uni na un partido mas grandi. Pa cu esaki Bikker a contesta cu e no a sali di POR y cu aunke tin rumornan y speculacion riba caya, e no lo reacciona riba esaki ni lo ofrece mas comentario tocante e tema aki.

Sinembargo, Alan Howell si a duna un declaracion cortico den cual el a expresa cu awe dialuna nan lo manda un otro comunicado pa medionan di comunicacion cu mas detayenan specifico di su parti, pa informa comunidad di e motibonan cu a bin dilanti pa nan tuma e decision aki.

Di mesun manera, el a afirma cu di su banda e si lo participa den eleccionnan cu lo tuma luga na luna di september cu e partido di e cual e ta lider cu ta POR como candidato number 1 riba e lista.