Hunga Teca ta sigui enfoca riba proyecto pa muchanan

A keda comproba cu den e temporada di pandemia esunnan cu a pasa mas stress y ta mas vulnerabel ta mucha y hoben, specialmente esunnan cu tin poco espacio y recurso.

Stichting Hunga Teca, un fundacion cu tin e meta pa fia mucha coy hunga y wega educativo, manera a keda conoci tabata cera pa e motibo di pandemia, pero no nan mes a sigura cu nan no a sinta keto.

Nan a informa cu nan a entrega un peticion pa un proyecto yama “Ban pasa pret” na Heutink Foundation, pa asina ofrece muchanan e oportunidad di sali fe nan ambiente di tur dia un rato y gosa, pasa pret na un manera cu ta promove un desaroyo sano pa e mucha.

E proyecto ta encera un mainta sea den naturalesa, un parke di hunga, bay cerca e luga cu ta cuida e buriconan etc., “mas importante ta pa nan ta den un ambiente sano y educativo”, segun nan a menciona den e simannan venidero nan tin 16 grupo consistiendo di cada biaha 15 mucha lo haya e oportunidad pa bay keiro y pasa pret cu Hunga Teca.

Diasabra 20 di februari nan tabatin e prome grupo di mucha cu a bay Parke Nacional Arikok, bao guia profesional di Ranger Salvador, un persona cu hopi conocemento di historia, geologia, flora y fauna di Aruba, e muchanan a hik y siña un cantidad di cos cu algun no tabata sa y algun a siña na school y awor a experiencia kico e ta.

Ranger Salvador, cu su experticio, conocemento y pasenshi ta anda asina bon cu mucha, cu e ta un joya pa e parke. Despues di e hik e muchanan a haya un lunch saludabel y balansa. Transportacion tabata den man di Allan Goede cu a hiba y trece e muchanan sano y salvo.

Yamila Hoevertsz-Kock presidente di Fundacion Hunga Teca el a splica cu “ta bon pa conoce e importancia di wega den desaroyo di mucha” Hoevertsz a expresa, segun e ora un mucha ta hunga e ta desaroya su celebro, sesonan ta bira mas grandi y door di esey e por siña miho y tambe e por memorisa miho, tambe a enfatisa cu ora e celebro ta crece su habilidad pa comunica y pa crea un vocabulario ta mas grandi, door di esey e ta capta un idioma mas lihe, vooral su idioma materno cu ta hopi importante y door di esey e por siña otro idiomanan mas facil.

Ademas, el a menciona cu ora muchanan ta hunga na aire liber y haci otro actividadnan nan ta desaroya un salud fisico, pa motibo cu un di e problemanan mas grandi cu Aruba tin awor ta muchanan cu ta sufri di obesidad, sobre peso y diabetes cu nan ta sedentario for di mucha y esey tin consecuencianan pa nan salud, e ta algo hopi preocupante.